تۇركىستان وبلىسىندا 500 مىڭ تونناعا جۋىق كوكونىس شەتەلگە ەكسپورتتالعان
نۇربەك بادىراقوۆتىڭ سوزىنشە، مۇنداي جەتىستىككە شارۋالار وڭىردە «اگرو ونەركاسىپ كەشەنىن دامىتۋدىڭ 2017 - 2021 -جىلدارعا ارنالعان مەملەكەتتىك باعدارلاماسىن» جۇزەگە اسىرۋدىڭ ارقاسىندا جەتىپ وتىر. «ەلباسىمىز نۇرسۇلتان ءابىش ۇلى نازاربايەۆ قازاقستان حالقىنا ارناعان جولداۋىندا ەڭبەك ونىمدىلىگىن جانە قايتا وڭدەلگەن اۋىل شارۋاشىلىعى ءونىمىنىڭ ەكسپورتىن 2022 -جىلعا قاراي 2,5 ەسە كوبەيتۋ جونىندە ناقتى مىندەتتەر قويىپ وتىر. وسى رەتتە اتالعان سالاداعى ءونىم كولەمىن ارتتىرۋ ماقساتىندا ءتيىستى شارالار قولعا الىنۋدا. ماسەلەن، بيىل ماساقتى ءداندى داقىلداردىڭ ەگىس كولەمى 23 مىڭ گەكتارعا ارتىپ 227 مىڭعا، داندىك جۇگەرى 7 مىڭ گەكتارعا ارتىپ، 44,3 مىڭعا، كوكونىس، كارتوپ، باقشا داقىلدارى 7,5 مىڭ گەكتارعا ارتىپ، 114 مىڭ گەكتارعا جەتىپ وتىر»، - دەدى نۇربەك بادىراقوۆ.
باسقارما باسشىسىنىڭ مىندەتىن اتقارۋشى سونداي- اق كوكتەمگى دالا جۇمىستارىن جۇرگىزۋگە ۇكىمەت تاراپىنان 1 ليترى 158 تەڭگەدەن 40,2 مىڭ توننا جانار- جاعارماي بولىنگەنىن اتاپ ءوتتى.
«بۇگىنگە دەيىن جانار- جاعارمايدىڭ 28,7 مىڭ تونناسى نارىقتاعى باعادان 27 تەڭگەگە ارزانداتىلىپ، اگروقۇرىلىمدارعا بولىنگەن. ودان بولەك، 50 پايىز جەڭىلدىكپەن اگروقۇرىلىمدارعا 80 مىڭ توننا مينەرالدى تىڭايتقىشتار ءبولىندى. ونىڭ 75 مىڭ تونناسى شارۋالارعا ۇلەستىرىلگەن»، - دەدى نۇربەك بادىراقوۆ.
ايتا كەتسەك، بيىلعى جىلى اۋا رايىنىڭ قۋاڭشىلىق بولعانىنا قاراماستان، ديقانداردىڭ ەسەلى ەڭبەگىنىڭ ارقاسىندا ماساقتى ءداندى داقىلداردىڭ ءار گەكتارىنان 17,8 سەنتنەردەن 405 مىڭ توننا ءونىم جينالعان. قازىرگى تاڭدا كۇرىشتەن باسقا ءداندى- داقىلداردى جيناۋ جۇمىستارى تولىعىمەن اياقتالعان. كۇرىشتىڭ 65 پايىزى ورىلىپ، اقمارجان تونناسى 12 مىڭعا جەتكەن.
ماقتا داقىلىنىڭ گەكتارىنان تۇسىمدىلىگى 25 سەنتنەردەن، 195,5 مىڭ توننا ءونىم جينالدى. كوكونىس، كارتوپ، باقشا داقىلدارىنان 2,8 ميلليون توننا ءونىم الىنىپ، رەكوردتىق كورسەتكىشكە قول جەتكىزىلدى. ونىڭ ىشىندە، 500 مىڭ تونناعا جۋىق ءونىم رەسەي، بەلارۋس، لاتۆيا، گەرمانيا مەملەكەتتەرىنە ەكسپورتتالعان.
اۆتور: اينۇر اقبايەۆا