ءۇش جىلدا ورىس مەكتەبىندەگى 500 مىڭ بالانى قازاقشا سويلەتەمىن - مينيستر ە. ساعاديەۆ
«ءۇش تىلدىلىك ماسەلەسىن كوتەرسەك، الدىمەن اعىلشىن ءتىلى شىعا كەلەدى. بۇل تەرىس. ءۇش تىلدىلىك - ول ەڭ الدىمەن قازاق ءتىلى تۋرالى باعدارلاما. تاعى دا اتاپ ايتامىن، ءۇش تىلدىلىك - ەڭ الدىمەن قازاق تىلىنە نازار سالادى. قازاق ءتىلىنىڭ جاعدايى قازىر جامان ەمەس... قازىر وقۋشىلاردىڭ 70 پايىزى قازاق تىلىندە وقيدى. بيىل ءبىرىڭعاي ۇلتتىق تەست تاپسىرعان وقۋشىلاردىڭ 72 پايىزى سىناقتى قازاق تىلىندە تاپسىردى. نازاربايەۆ زياتكەرلىك مەكتەپتەرى گرانتىنىڭ 70 پايىزىن قازاق تىلىنە ءبولدى. سوندىقتان، جاعدايىمىز جامان ەمەس»، - دەيدى مينيستر.
ءبىراق، ءبىلىم جانە عىلىم ءمينيسترىن مازالايتىن ءبىر ماسەلە بار ەكەن. ول - ورىس مەكتەپتەرىندە وقىپ جۇرگەن بەس ءجۇز مىڭ بالانىڭ ءتىل تاعدىرى.
«ءبىراق، پروبلەما قانداي؟ قازىر ورىس مەكتەپتەرىندە وقيتىن بەس ءجۇز مىڭ بالا قازاقشا سويلەمەيدى. سوندىقتان، مينيسترلىكتىڭ الدىنداعى ەڭ جوعارعى ماقسات 3-4 جىلدا بەس ءجۇز مىڭ بالانى قالاي قازاقشا سويلەتەمىز دەگەن ماسەلە. ولار قازاقشا سويلەۋ كەرەك قوي. ءتۇسىنىپ وتىرمىز، وقىتۋ ادىستەمەسى دۇرىس ەمەس. ەڭ الدىمەن دۇرىس ادىستەمە جاساۋ كەرەك. ءۇش- ءتورت زياتكەرلىك ينستيتۋت جينالىپ، ادىستەمەنى دايىنداپ جاتىر. وسى ادىستەمە دايىن بولسا، 2017 -جىلدان باستاپ ورىس مەكتەپتەرىندە قازاق تىلىندە وتەتىن ساباقتار وزگەرە باستايدى. ەڭ الدىمەن، دۇرىس ادىستەمە كەرەك. زاماناۋي عىلىمي نەگىزدە جاسالعان، كومپيۋتەرلىك مودەلدەۋدەن وتكەن التى ايدا ءتىل ۇيرەتەتىن ادىستەمە جاساپ جاتىرمىز. ءۇش جىلدىڭ ىشىندە بالالاردىڭ بارلىعى قازاقشا سويلەيدى. مەن وعان سەنىپ وتىرمىن»، - دەدى مينيستر ە. ساعاديەۆ.
اۆتور: كەنجەكەي توقتامۇرات قىزى