بۇگىن «ەكسپەرت» كلۋبىنىڭ وتىرىسىنا قاتىسقان ق م د ب ءتوراعاسىنىڭ ورىنباسارى، نايب ءمۇفتي سەرىكباي قاجى وراز «مەشىتتەردە قۇران وقىعاندا، حالىق تاستايتىن اقشا قايدا كەتىپ جاتىر؟» دەگەن سۇراققا جاۋاپ بەردى.
«وتە ورىندى سۇراق. بۇل ەلىمىزدىڭ ءاربىر ازاماتى ءۇشىن ماڭىزدى سۇراق. ءبىزدىڭ ەلىمىزدە 2500 مەشىت بار. سونىڭ ىشىندە، ءبىزدىڭ ەسەبىمىزدەگى 500 مەشىت اقشا تۇسەتىن مەشىتتەر بولىپ سانالادى. قالعان مەشىتتەردى، مىسالى، اۋىلداعى مەشىتتەردى الىپ قاراساق، جىلدا ورازانىڭ الدىندا ءبىر رەت مولدا ارقىلى جيناپ بەرەتىن ءبىر عانا ءپىتىر ساداقاسى بولادى. ول كەلەسى جىلعا دەيىن مولدانىڭ، ازانشىنىڭ جالاقىسىن تولەۋگە، مەشىتتىڭ كوممۋنالدىق شىعىندارىن تولەيتىن اقشا رەتىندە ەسەپتەلەدى»، - دەپ حابارلادى يمام.
ال، جوعارىدا ايتقان قارجى ۇنەمى ءتۇسىپ وتىراتىن 500 مەشىتتىڭ ەسەپ- قيسابى قازاقستان مۇسىلماندار ءدىني باسقارماسىنىڭ قوعامدىق كەڭەسىنىڭ نازارىندا ەكەن.
«قازاقستان مۇسىلماندارى ءدىني باسقارماسىنىڭ 21 سايتى بار، سول سايتتاردا اتقارىپ جاتقان جۇمىستاردى، قارجى- شارۋاشىلىق باعىتىنداعى جۇمىستارىمىزدى جاريالاپ وتىرامىز. ءبىراق، ەڭ باستىسى، مۇندا ءبىر مىنانداي ەرەجە بار: ءبىزدىڭ كۇندەلىكتى كەلىپ وتىرعان جاماعاتىمىزدىڭ ىشىندە 11 ادامنان قۇرالعان ريەۆيزيالىق كوميسسيانىڭ مۇشەلەرى بار. قارجى جاعدايىمىز اشىق بولۋ ءۇشىن، بىلتىردان باستاپ ەلەكتروندى ترەمينالدار ەنگىزدىك. استانا مەشىتتەرىندە تەرمينالدار ورناتتىق، بىرتە بىرتە جەتىلدىرىپ جاتىرمىز. ياعني، حالىقتىڭ ساناسىندا ەشقانداي كۇماندى نارسە بولماۋ كەرەك. ەگەر ناقتى ەسەپ كەرەك بولسا، ءبىز ونى نازارلارىڭىزعا ۇسىنا الامىز. «مەشىتكە ميللياردتاعان اقشا تۇسەدى» دەگەن ويدان ارىلۋ كەرەك. قازىر بىزدە 3600 مامان بار بولسا، سولارىڭ 2000-عا تارتاسىنا قازاقستاننىڭ ورتا دەڭگەيدەگى كورسەتكىشىنە ساي، ايلىق بەرە الماي وتىرمىز. قازىردە «نۇر مۇباراك» ۋنيۆەرسيتەتىن بىتىرگەن التى جۇزدەن استام ءدىن مامانىنىڭ كوبى باسقا سالادا جۇمىس ىستەپ ءجۇر»، - دەدى س. وراز.
اۆتور: كەنجەكەي توقتامۇرات قىزى