قۇنى 500 ميلليون ەۋرو تۇراتىن ەكى جەل ەنەرگياسى قوندىرعىسى ىسكە قوسىلدى - فوتو

پەتروپاۆل. قازاقپارات - سولتۇستىك قازاقستان وبلىسىندا قىزىلجار اۋدانىندا «زەنچەنكو جانە ك» كوممانديتتىك سەرىكتەستىگىندە يندۋستريالاندىرۋ كارتاسىنىڭ ەكىنشى بەسجىلدىعىن جۇزەگە اسىرۋ اياسىندا ەكى جەل ەنەرگياسى قوندىرعىسى پايدالانۋعا بەرىلدى.

ولاردىڭ ءارقايسىسىنىڭ قۋاتى 1 مەگاۆات، ءبىر قوندىرعىنىڭ قۇنى 500 ميلليون ەۋرو.

 سالتاناتتى جاعدايدا قىزىلجار اۋدانىنىڭ تۇرعىندارى مەن «زەنچەنكو جانە ك» ك س جۇمىسشىلارىنىڭ قاتىسۋىمەن ونى ىسكە قوسۋ قۇرمەتى ءوڭىر باسشىسى ەرىك سۇلتانوۆقا بەرىلدى.

«ەلىمىزدە قايتارىمدى ەنەرگيا كوزدەرىن دامىتۋ مەملەكەتتىك ساياساتتىڭ باسىمدىقتى باعىتى. بۇل قوندىرعىلار 2012 - جىلى جەلتوقساندا جالپى ۇلتتىق تەلەكوپىر بارىسىندا تانىستىرىلعان بولاتىن. بۇگىندە «زەنچەنكو جانە ك» ك س ەلىمىزدە «جاسىل» ەكونوميكانى دامىتۋعا ۇلەس قوسۋدى جالعاستىرۋدا. بۇعان بۇرىنعىلاردان دا قۋاتتىراق تاعى ەكى جەل ەنەرگياسى قوندىرعىلارى ورناتىلىپ وتىرعانى دالەل»، - دەدى ءوز سوزىندە ەرىك سۇلتانوۆ.

قۇرىلىس «استانا ەكسپو-2017» ۇ ك مەن سولتۇستىك قازاقستان وبلىسى اكىمدىگى اراسىنداعى ىنتىماقتاستىق تۋرالى مەموراندۋمدى جۇزەگە اسىرۋ شارالارىنىڭ جوسپارىنا سايكەس جۇزەگە اسىرىلدى. ءاربىر قوندىرعىنىڭ قۋاتى 1 مەگاۆات، بيىكتىگى - 74 مەتر، سالماعى 150 توننادان اسادى.

«جەل ەنەرگياسى قوندىرعىلارى گەرمانيادان ساتىپ الىندى. ءارقايسىسىنىڭ قۇنى - 500 ميلليون ەۋرو. بارلىق ەلەكتر قۋاتى س ق ا ە ك كىشى- ستانساسىنا جىبەرىلەدى. وندا قانشا ەلەكتر ەنەرگياسى شىعارىلعانىن ەسەپتەۋىش بار. شىعارىلعان ەنەرگيا وندىرىسكە جانە حالىققا جۇمسالادى. اي سايىن 5-6 ميلليون تەڭگە ۇنەمدەۋدى جوسپارلاپ وتىرمىز. قوندىرعىلار 3-4 جىلدا ءوزىن اقتاپ شىعادى»، - دەدى كوممانديتتىك سەرىكتەستىكتىڭ باس ينجەنەرى يۆان زەنچەنكو.

 جەل گەنەراتورلارىن پايدالانۋعا بەرۋ ەنەرگيا شىعىندارىن ايىنا 6,3 ميلليون تەڭگەگە دەيىن قىسقارتادى جانە سەرىكتەستىكتىڭ ەنەرگيا قاجەتىن 100 پايىز جابادى. ەكى جىلدىڭ ىشىندە جەل قوندىرعىلارى 4 ميلليون كۆت/ساعات ەلەكتر ەنەرگياسىن ءوندىردى.