قازاقستان كاسپي ماڭى ويپاتىندا 500 ميلليون دوللارعا بۇرعىلاۋ جۇمىستارىن اتقارماق
بۇل تۋرالى گەولوگيالىق بارلاۋ تاقىرىبىنا ارنالعان حالىقارالىق فورۋمدا ق ر ەنەرگەتيكا مينيسترىنىڭ ءبىرىنشى ورىنباسارى ۇزاقباي قارابالين ءمالىم ەتتى.
ونىڭ سوزىنە قاراعاندا، مۇنايدى جەڭىل بۇرعىلاۋ جۇمىستارىنىڭ داۋرەنى وتكەن. سەبەبى نەگىزگى مۇنايگاز قورلارى 7-15 شاقىرىم تەرەڭدىكتە ورنالاسادى. مىسال رەتىندە ول مەكسيكا تۇبەگىندەگى 10 شاقىرىم تەرەڭدىكتە تابىلعان مۇنايدىڭ مول قورىن مىسالعا كەلتىردى.
«ەگەر وسىنىڭ بارلىعىن قازاقستانعا تەليتىن بولساق، ءبىزدىڭ جەتىستىكتەر نەگىزىنەن كاسپي ماڭى ويپاتىندا ورىن الدى. سەبەبى وندا ءبىزدىڭ مۇناي قورىمىزدىڭ 75-80 پايىزى جيناقتالعان. دەگەنمەن 15-20 جىلدان سوڭ، تەڭىز جانە قاراشىعاناقتاعى مۇناي ءوندىرۋ كولەمى كۇرت كەميدى»، - دەدى ول.
ونىڭ اتاپ كورسەتكەنىندەي، قوردىڭ كولەمىن تەك تەرەڭ قاباتتاردا جاتقان مۇناي ەسەبىنەن مولايتۋعا بولادى. «سوڭعى كەزدە قازاقستاننىڭ 15 شوكپە باسسەيىندەرىنە جاسالعان گەولوگيالىق زەرتتەۋلەر كورسەتىپ وتىرعانىنداي، كاسپي ماڭى ويپاتىنىڭ تەرەڭ قاباتتارىندا شامامەن 67 ميلليارد توننا شارتتى وتىن قورى جيناقتالعان، ودان الىناتىنى - 27 ميلليارد توننا. وسىلايشا رەسۋرستىق بازانى 3 ەسەگە ارتتىرۋعا بولادى»، - دەپ اتاپ ءوتتى ول.
ونىڭ حابارلاۋىنشا، وسىنداي تەرەڭ بۇرعىلاۋ جۇمىستارىن جۇرگىزۋ ءۇشىن كاسپي ماڭى ويپاتىندا 500 ميلليون دوللارلىق «ەۋرازيا» گەولوگيالىق جوباسى قولعا الىنادى. بۇرعىلاۋ جۇمىستارى ويپاتتىڭ ورتالىق تۇستارىندا 14-15 شاقىرىم تەرەڭدىككە جاسالادى.
«بۇل جوسپارلانعان پارامەتريكالىق ۇڭعىمانى بۇرعىلاۋ الەمدە وسى سالاداعى تەڭدەسى جوق جوبا بولماق»، - دەپ اتاپ ءوتتى ول.
اۆتور: جاسۇلان جولدىبايەۆ