قاردىڭ قالىڭ ءتۇسۋى سالدارىنان سوڭعى بىرەر ساعاتتا 500 دەي كولىك سوعىستى
07:40, 26 - جەلتوقسان 2014
ماسكەۋ. قازاقپارات - ماسكەۋدە سوڭعى ساعاتتاردا 500 گە جۋىق جول اپاتى تىركەلدى، بۇل استانا جولدارىنداعى كۇردەلى جاعدايدى ودان ءارى قيىنداتا تۇسۋدە، دەپ حابارلادى ria.ru.
بەيسەنبى ماسكەۋدە قالىڭ قار جاۋدى. سالدارىنان كولىكتەر كەپتەلىسكە ءتۇستى. «ياندەكس. پروبكي» سەرۆيسى ءبىرىنشى جارتى كۇندىكتىڭ وزىندە بىرنەشە جىلدان بەرى العاش رەت ورىن العان ون بالدىق كەپتەلىستى تىركەگەن. قازىر دە استانادا 10 بالدىق كەپتەلىس ورىن الىپ تۇر.
«اۋا رايىنىڭ توسىن مىنەزى جول اپاتىنىڭ ارتۋىنا دا ايتارلىقتاي اسەر ەتتى. سوڭعى ساعاتتاردا 500 دەن استام جول اپاتى (ولاردىڭ 45 ءى اۋىر سالدارمەن) تىركەلدى»، - دەلىنگەن حابارلامادا.