ولار ءبىلىم الۋ، جۇمىسقا ورنالاسۋ، كاسىپ باستاۋ جانە كاسىبي تۇرعىدان دامۋ مۇمكىندىكتەرىن تالقىلادى.
ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «وتانداستار كەزدەسۋى: جاستار فورۋمى» ءوتتى. باسقوسۋ اتاجۇرتقا ورالعان جاستاردى قازاقستانداعى مۇمكىندىكتەرمەن جاقىنىراق تانىسۋىنا جول اشتى.
فورۋمنىڭ باستى ماقساتى — شەتەلدەن كەلگەن قازاق جاستارىنىڭ ءبىلىم مەن ەڭبەك نارىعىنداعى الەۋەتىن اشۋ، قوعامعا بەيىمدەلۋىنە كومەكتەسۋ جانە ەلدەگى كاسىبي دامۋ مەن كاسىپكەرلىك مۇمكىندىكتەرىن تانىستىرۋ.
— باعدارلاما اياسىندا موتيۆاتسيالىق سەسسيا ۇيىمداستىرىلىپ، سپيكەرلەر جاستارمەن ءبىلىمنىڭ ماڭىزى، ۇلتتىق قۇندىلىقتار، ماقسات قويۋ، كوشباسشىلىق، تۇلعالىق دامۋ جانە كاسىپكەرلىك تۋرالى وي ءبولىستى. ستۋدەنتتەر سپيكەرلەرگە كوكەيدەگى سۇراقتارىن قويىپ، اشىق پىكىر الماستى. اسىرەسە قازاقستاندا جۇمىسقا ورنالاسۋ، كاسىپ اشۋ، ءبىلىمىن جالعاستىرۋ جانە كاسىبي ورتاعا بەيىمدەلۋ ماسەلەلەرى تالقىلاندى، — دەپ حابارلايدى وتانداستار قورى.
فورۋم اياسىندا قانداس ستۋدەنتتەردىڭ تىڭ يدەيالارىن قولداۋعا باعىتتالعان «OQ-startup» شىعارماشىلىق بايقاۋىنىڭ جەڭىمپازدارى دا ماراپاتتالدى. بايقاۋ يننوۆاتسيالىق، الەۋمەتتىك جانە شىعارماشىلىق جوبالاردى انىقتاپ، جاستاردىڭ باستامالارىنا قولداۋ كورسەتۋ ماقساتىندا وتكىزىلگەن.