مۇناي باعاسى 50 دوللاردان تومەن بولىپ قالا بەرسە، 7 مىڭ مۇنايشى جۇمىسىنان ايىرىلۋى مۇمكىن
بۇل تۋرالى بۇگىن ق ر ۇكىمەتىنىڭ سەلەكتورلىق رەجىمدەگى وتىرىسى بارىسىندا ەلىمىزدىڭ ەنەرگەتيكا ءمينيسترى ۆلاديمير شكولنيك ءمالىم ەتتى.
«ەگەر، تىكەلەي مۇناي وندىرەتىن كومپانيالار جايىندا ايتار بولساق، ول جاقتا احۋال مىناداي: باعا 50 دوللاردان تومەن بولعان جاعدايدا بارىنشا جوعارى باعالاۋلارعا سايكەس جۇمىس ورىندارىنىڭ قىسقارۋ تاۋەكەلى 10 پايىزعا دەيىندى، ياعني، 7 مىڭ ادامدى قۇرايدى. ال باعا 60-50 دوللار بولسا 5 مىڭ، 70-60 دوللار بولسا شامامەن 2-2,5 مىڭ ادام»، - دەدى ول.
وسىعان وراي ول ۇلتتىق ەكونوميكا مينيسترلىگىنە مۇنايدىڭ ەكسپورتتىق كەدەندىك سالىعى ستاۆكالارىن ەسەپتەۋ ءادىسىن ەنگىزۋدى ۇسىنعاندىقتارىن اتاپ ءوتتى. سونىمەن قاتار، ول مۇنايشىلار قىسقارتۋعا ۇشىراعان جاعدايدا دا ولاردىڭ جۇمىسسىز قالمايتىندىعىن اتاپ ءوتتى.
«ەگەر ءبىز 13 جوبا ىسكە قوساتىن بولساق، وندا ونىڭ قۇرىلىسى بارىسىندا 21,5 مىڭ جۇمىس ورنى، ونىڭ ىشىندە تۇراقتى شامامەن 6 مىڭ ورىن قۇرىلادى. ت ش و كەڭەيتۋگە قاتىستى شەشىمدى ءبىز جەلتوقساندا قابىلدايمىز. كەڭەيتۋ بارىسىندا 20 مىڭ جۇمىس ورنى قۇرىلادى»، - دەدى مينيستر.
اۆتور: مارلان جيەمباي