ازيا ويىندارىنىڭ 5- اشىلۋىنا جۇمىلدىرىلعان 7,5 مىڭ ادامعا 75 مىڭ كوستيۋم تىگىلگەن - فوتو
سالتاناتتى شارا بارىسىندا ۇيىمداستىرۋشىلار تۇرىكمەن حالقىنىڭ ەجەلگى تاريحى مەن بۇگىنىن ۇشتاستىرا وتىرىپ، تۇرىكمەنستاننىڭ باي سالت- ءداستۇرىن كورسەتۋگە تىرىسۋدا. اشىلۋ راسىمىنە 7 مىڭنان استام ونەر قايراتكەرى قاتىسۋدا. ولاردىڭ 2 مىڭنان استامى كاسىبي بيشىلەر، مۋزىكانتتار مەن انشىلەر. ءبىر جىلدان استام بۇرىن عانا اشىلعان 45 مىڭ ادام سياتىن وليمپيادالىق ستاديونعا 5475 ەرىكتى مەن 54 بالا جۇمىلدىرىلعان. ستاديوندا ءوتىپ جاتقان كەيبىر قويىلىمعا تۇرىكمەندەر اسا قادىرلەيتىن اقالتەكەلەر دە شىعارىلعان.
ازيا ويىندارىنىڭ اشىلۋ ءراسىمىن ۇيىمداستىرعان «Balich Worldwide Shows» ماركو باليچتىڭ سوزىنە قاراعاندا، بۇگىنگى سالتاناتتى شارا اتالعان كومپانيا ۇيىمداستىرعان قويىلىمداردىڭ ىشىندەگى ەڭ اۋقىمدىسى بولماق.
«ەكى جارىم ساعاتقا جۋىق ۋاقىت وتەتىن شاراعا شامامەن 7500 ورىنداۋشى، 200 مۋزىكانت، 10 جانۋار قاتىسادى. قويىلىمدارعا 75 مىڭ كوستيۋم تىگىلگەن»، - دەدى ول.
سالتاناتتى ءراسىمدى وزگە ءبىرقاتار مەملەكەتتىڭ باسشىلارىمەن بىرگە قازاقستان پرەزيدەنتى نۇرسۇلتان نازاربايەۆ تاماشالاۋدا.
ايتا كەتەرلىگى، بۇگىن نۇرسۇلتان نازاربايەۆپەن ەكىجاقتى كەزدەسۋ وتكىزگەن تۇرىكمەنستان پرەزيدەنتى عۇربانع ۇلى بەردىمۇحامەدوۆتىڭ ايتۋىنشا، ازيا ويىندارىنا الەمنىڭ 64 مەملەكەتىنەن سپورتشىلار كەلگەن. بۇعان قوسا، ب ۇ ۇ وتىنىشىمەن بوسقىندار دا بۇل جارىسقا ارنايى كوماندا قۇرىپ، سىنعا تۇسپەك.
ال قازاقستاننىڭ 150 سپورتشىسى جارىستىڭ 17 تۇرىنەن ەل نامىسىن قورعايتىن بولادى. ولاردىڭ قاتارىندا وليمپيادا چەمپيونى ولگا رىپاكوۆا، گرەك- ريم كۇرەسىنەن الەم چەمپيوناتىنىڭ 3 دۇركىن جۇلدەگەرى نۇرماحان تىناليەۆ، قىزدار كۇرەسىنەن الەم چەمپيوناتىنىڭ كۇمىس جۇلدەگەرى جۇلدىز ەشىموۆا سىندى سپورتشىلار بار. ازيا ويىندارىنىڭ اشىلۋ سالتاناتىندا ەلىمىزدىڭ كوك بايراعىن تاەكۆوندودان قازاقستان چەمپيونى نۇرلان مىرزابايەۆ ۇستاپ شىىقتى.