بريۋسسەل كونفەرەنسياسى كەزىندە دونورلار سيريا ءۇشىن 5,6 ميلليارد ەۋرو جينادى

بريۋسسەل. قازاقپارات - ەۋروپا استاناسىندا «سيريا مەن ايماقتىڭ بولاشاعىن قولداۋ» اتتى جەتىنشى بريۋسسەل كونفەرەنسياسى ءوتتى، دەپ حابارلايدى قازاقپارات ءتىلشىسى.

حالىقارالىق دونورلاردىڭ ەكى كۇندىك كونفەرەنتسياسىنىڭ ناتيجەسىندە سيريا حالقىنا 5,6 ميلليارد ەۋرو ءبولۋ تۋرالى كەلىسىمدەرگە قول جەتكىزىلدى، ونىڭ 4,6 ميللياردىن بيىل، 1 ميللياردىن 2024-جىلى ءبولۋ جوسپارلاندى.

جاريالانعان قارجى سيرياداعى جانە سيريالىق بوسقىنداردى قابىلدايتىن كورشىلەس ەلدەردەگى ادامداردى قولداۋعا باعىتتالادى.

ە و سونداي-اق 3,8 ميلليارد ەۋرو، ونىڭ ىشىندە 2,1 ميلليارد ەۋرو ەۋروپالىق كوميسسيادان جانە 1,7 ميلليارد ەۋرو ەۋرووداققا مۇشە ەلدەردەن گرانت رەتىندە بەرۋگە ۋادە ەتتى.

ەۋروكوميسسيا 2011-جىلى داعدارىس باستالعالى بەرى ەو مەن وعان مۇشە ەلدەر سيريا مەن ايماقتاعى سيريالىقتاردى قولداۋ ءۇشىن 30 ميلليارد ەۋرودان استام قاراجات جۇمىلدىرعانىن حابارلادى. سونىمەن قاتار، حالىقارالىق قارجى ينستيتۋتتارى مەن دونورلار 4 ميلليارد ەۋرو كولەمىندەگى نەسيەلەردى جاريالاپ، گرانتتار مەن نەسيەلەردىڭ جالپى كولەمىن 9,6 ميلليارد ەۋروعا جەتكىزدى.

2017 -جىلدان بەرى سيريا بويىنشا بريۋسسەل كونفەرەنتسيالارى سيرياداعى جانە كورشىلەس ەلدەردەگى سيريالىقتارعا، سونداي-اق ايماقتاعى سيريالىق بوسقىنداردى قابىلدايتىن قاۋىمداستىقتارعا اسەر ەتەتىن ماڭىزدى گۋمانيتارلىق جانە تۇراقتىلىق ماسەلەلەرىنە نازار اۋداردى.

كونفەرەنتسيا سيريانىڭ كورشىلەرىنە، اتاپ ايتقاندا يوردانياعا، ليۆانعا جانە تۇركياعا، سونداي-اق مىسىر مەن يراكقا حالىقارالىق قاۋىمداستىقتىڭ ساياسي جانە قارجىلىق قولداۋىن جاڭارتۋعا باعىتتالعان.

بۇعان دەيىن 2023-جىلدىڭ باسىندا اقپان ايىنداعى جويقىن جەر سىلكىنىسىنەن كەيىن تۇركيا مەن سيريا حالقىنا قولداۋ كورسەتۋ ماقساتىندا ارنايى دونورلىق كونفەرەنسيا وتكەن بولاتىن.