پوليتسەي بولىپ قوڭىراۋ شالعان: زەينەتكەر الاياققا 5,5 ميلليون تەڭگەسىن بەرىپ قويدى

پەتروپاۆل. قازاقپارات - پەتروپاۆلدىڭ 76 جاستاعى تۇرعىنى الاياقتارعا الدانىپ، 5,5 ميلليون تەڭگەسىنەن ايىرىلدى. پوليسياعا دەر كەزىندە جۇگىنۋدىڭ ارقاسىندا اقشانى قايتارۋ مۇمكىن بولدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلدىڭ 76 جاستاعى تۇرعىنىنا بىرەۋلەر قوڭىراۋ شالىپ، «ءسىزدىڭ قىزىڭىز جول- كولىك وقيعاسىنىڭ سەبەپكەرى بولدى، ونىڭ كەسىرىنەن جۇكتى ايەل ءولىم اۋزىندا جاتىر» دەپ حابارلاسقان. تەلەفوننىڭ ار جاعىنداعى بەيتانىس ءوزىن پوليتسيا قىزمەتكەرى رەتىندە تانىستىرعان. ونىڭ ايتۋىنشا، اپاتتان زارداپ شەككەن ايەلدىڭ تۋىستارى ولارعا ۇلكەن سومادا اقشا تولەنگەن جاعدايدا ارىز جازباۋعا كەلىسكەن. كۇتپەگەن حاباردان ەسەڭگىرەگەن زەينەتكەر كەلىسىپ، ۇيىنە كەلگەن كۋرەرگە ءوزىنىڭ بارلىق جيناپ- تەرگەن 5,5 ميلليون تەڭگە اقشاسىن بەرىپ جىبەرگەن.

كوپ ۇزاماي ونىڭ قىزى ۇيگە كەلىپ، وقيعاعا قانىققاننان كەيىن دەرەۋ پوليتسياعا جۇگىنگەن. ءتارتىپ ساقشىلارى كۋرەردى الىسقا ۇزاتپاي ۇستادى. اقشا تاركىلەندى. پوليتسەيلەردىڭ ايتۋىنشا، ول پەتروپاۆلدا تىركەلگەن الاياقتىقتىڭ تاعى ەكى فاكتىسىنە قاتىسى بولۋى مۇمكىن.

«پەتروپاۆلدىڭ 17 جاستاعى تۇرعىنى ۇستالدى، كامەلەتكە تولماعاندىعىنا بايلانىستى ول اتا- اناسىنىڭ كەپىلدىك بەرۋىمەن بوساتىلدى. بۇل فاكتى ق ر قىلمىستىق كودەكسىنىڭ 190-بابى 3-بولىگى «الاياقتىق» بويىنشا سوتقا دەيىنگى تەرگەپ- تەكسەرۋلەردىڭ ءبىرىڭعاي تىزىلىمىنە تىركەلدى. ادامداردى وسىلايشا الداۋ سحەماسى كەڭىنەن تارالىپ كەلەدى. سوندىقتان تۇرعىنداردى ەسكەرتكىمىز كەلەدى. وسىنداي جاعدايدا اڭگىمەنى ءۇزىپ، الاياقتار ءسوز ەتىپ وتىرعان تۋىستارىڭىزعا حابارلاسىڭىزدار، جول- كولىك وقيعاسى فاكتىسىنىڭ جوقتىعىنا كوز جەتكىزۋ ءۇشىن «102» ارناسىنا دەرەۋ قوڭىراۋ شالۋ قاجەت»، - دەيدى س ق و پ د پەتروپاۆل قالالىق پوليتسيا باسقارماسىنىڭ باستىعى ەربول تايبەكوۆ.