تاياۋ 5 جىلدا ەلوردادا سۋمەن جابدىقتاۋ قىزمەتتەرىنىڭ ءتاريفى 3-5 ەسەگە قىمباتتاماق
«ەلوردا اكىمدىگى 2035-جىلعا دەيىنگى كەلەشەكتە قاجەتتى كولەمدە تۇراقتى سۋمەن جابدىقتاۋدى قامتاماسىز ەتۋ ماقساتىندا ساتبايەۆ كانالىنان ءۇشىنشى سورعى-سۇزگى ستانساعا دەيىن بەرىلەتىن سۋ قۇبىرىن سالۋ ماسەلەسىن قاراستىرۋدا. وسى جوبا بويىنشا جوبالاۋ-ىزدەستىرۋ جۇمىستارىن 2024-جىلى باستاۋ جوسپارلانعان. قاجەتتى قاراجات كولەمى مەملەكەتتىك ۆەدومستۆودان تىس ساراپتاما جوباسىنان وتكەننەن كەيىن ايقىندالاتىن بولادى»، - دەدى اكىمدىك اگەنتتىكتىڭ رەسمي ساۋالىنا بەرگەن جاۋابىندا.
ۇسىنىلعان اقپاراتقا قاراعاندا سۋ قۇبىرىن جوبالاۋدى شامامەن 2025-جىلى اياقتاۋ جوسپارلانىپ وتىر.
«قالا تۇرعىندارىن اۋىز سۋمەن قامتاماسىز ەتۋدىڭ بالامالى جولدارىنىڭ ءبىرى - حالىق ءۇشىن سۋمەن جابدىقتاۋ قىزمەتتەرىنە تاريفتى تاياۋداعى 5 جىلدا ورتا ەسەپپەن 3-5 ەسەگە ارتتىرۋ. بۇل جول ەلوردا تۇرعىندارىنىڭ اۋىز سۋدى ۇنەمدى جانە ۇقىپتى پايدالانۋىنا ىقپال ەتەتىن بولادى. سونىمەن قاتار، بۇل تۇرعىن ۇيلەر مەن پاتەرلەردە سۋدى ۇنەمدەيتىن سانتەحنيكالىق قۇرىلعىلاردى ورناتۋعا جانە پايدالانۋعا اكەلەدى»، - دەپ ناقتىلايدى اكىمدىكتەن.