بەزبۇيرەك انا 5 ايلىق ءسابيىن اشتان ولتىرىپ، 12,5 جىلعا سوتتالدى
08:14, 28 - تامىز 2014
استانا. قازاقپارات - سانكت-پەتەربور قالاسىنىڭ كيروۆ اۋداندىق سوتى 5 ايلىق ءسابيىن جابىق پاتەردە اش قالدىرعان الەنا يپاتوۆانى 12,5 جىلعا باس بوستاندىعىنان ايىرۋ تۋرالى ۇكىم شىعاردى، دەپ حابارلادى رەسەيلىك ب ا ق.
ول جازاسىن جالپى رەجىمدەگى كولونيادا وتەيتىن بولادى.
بۇعان دەيىن مەملەكەتتىك ايىپتاۋشى يپاتوۆانى 19 جىل 5 ايعا باس بوستاندىعىنان ايىرۋدى سۇراعان ەدى.
تەرگەۋ ماتەريالدارىنا قاراعاندا، بەزبۇيرەك انا 2014- جىلدىڭ 14- قاڭتارىندا ءوزىنىڭ 5 ايلىق بالاسىن بوس پاتەردە قالدىرىپ كەتكەن. ەكى اپتا وتكەننەن كەيىن، 27- قاڭتاردا ءسابيدىڭ مۇردەسىن ونىڭ 66 جاستاعى اتاسى تاۋىپ العان بولاتىن. ءدال وسى كۇنى پوليتسيا قىزمەتكەرلەرى جاس كەلىنشەكتىڭ قولىنا كىسەن سالدى.
اۆتور: مارلان جيەمباي