ا. باتالوۆ: ءبىزدىڭ الدىمىزدا 5 ينستيتۋتسيونالدى رەفورمانى جۇزەگە اسىرۋ جولىندا 100 ناقتى قادامدى ورىنداۋ مىندەتى تۇر

استانا. قازاقپارات - الماتى وبلىسىنىڭ اكىمى اماندىق باتالوۆتىڭ توراعالىعىمەن وبلىس اكىمدىگىنىڭ وتىرىسى ءوتتى.

كۇن تارتىبىندە ەكى ماسەلە: 2015-جىلدىڭ 1- جارتىسىنداعى وبلىستىڭ الەۋمەتتىك-ەكونوميكالىق دامۋىنىڭ قورىتىندىلارى جانە 2-جارتىجىلدىققا ارنالعان مىندەتتەر، بارلىق دەڭگەيدەگى اكىمدەردىڭ تۇرعىندارمەن وتكىزگەن ەسەپتىك كەزدەسۋلەرىندە ايتىلعان ۇسىنىستار مەن ەسكەرتۋلەر بويىنشا قابىلدانعان ءىس-شارالار جوسپارىنىڭ ورىندالۋ بارىسى تۋرالى ماسەلەلەر قارالدى. بۇل تۋرالى الماتى وبلىسى اكىمىنىڭ باسپا ءسوز قىزمەتىنەن حابارلادى.

ءبىرىنشى ماسەلە بويىنشا وبلىس اكىمىنىڭ ءبىرىنشى ورىنباسارى ماحاببات بيگەلديەۆ بايانداما جاسادى. بايانداماشى ءوز سوزىندە، بيىلعى جىلدىڭ 1- جارتى جىلدىعىندا وبلىستىڭ الەۋمەتتىك-ەكونوميكالىق دامۋىندا تۇراقتى سەرپىن ساقتالعانىن ايتتى. اۋىل شارۋاشىلىعى ءونىمىنىڭ جالپى كولەمى 108,3 ميلليارد تەڭگەنى قۇرادى، ناقتى كولەم كورسەتكىشى - 1,6. اۋىل شارۋاشىلىعى داقىلدارىنىڭ بارلىق ەگىستىك القابى 5,7 مىڭ گەگتارعا ۇلعايىپ، 926,8 مىڭ گەگتارعا جەتكەن.

ونەركاسىپ ءونىمى 249,0 ميلليارد تەڭگەگە ءوندىرىلدى. جاڭا 20 ونەركاسىپ وبەكتىلەرى ىسكە قوسىلىپ، جۇمىس جاساپ تۇرعان 4 ءوندىرىس كەڭەيتىلدى، قوسىمشا 871 جۇمىس ورنى قۇرىلدى. نەگىزگى كاپيتالعا تارتىلعان ينۆەستيتسيالار كولەمى 199,5 ميلليارد تەڭگەنى قۇرادى. م. بيگەلديەۆ بايانداماسىندا «بيزنەستىڭ جول كارتاسى-2020»، «جۇمىسپەن قامتۋ جول كارتاسى-2020»، «بالاپان»، شاعىن جانە ورتا بيزنەستى دامىتۋ، سالىق ءتۇسىمى، جىلىتۋ ماۋسىمىنا دايىندىق جانە تاعى باسقا دا الەۋمەتتىك ماسەلەلەرگە توقتالىپ ءوتتى.

جارىسسوزگە رايىمبەك، قاراساي، كەربۇلاق اۋداندارىنىڭ اكىمدەرى مەن وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ باسشىسى ب. تانەكەنوۆ شىعىپ، ءوز وڭىرلەرى مەن سالالارىندا اتقارىلىپ جاتقان جۇمىستارى تۋرالى ايتتى.

ەكىنشى ماسەلە بويىنشا وبلىس اكىمى اپپاراتىنىڭ باسشىسى سۇلتان دۇيسەمبىنوۆ باياندادى. ونىڭ ايتۋىنشا، ەسەپتىك كەزدەسۋلەردە بارلىعى 470 ۇسىنىستار مەن ەسكەرتۋلەر ايتىلعان. بايانداماشى ۇسىنىس-ەسكەرتپەلەر بويىنشا جاسالعان ءىس-شارالار جوسپارىنىڭ ورىندالۋ بارىسىنا توقتالدى.

وبلىس اكىمى ا. باتالوۆ: «مەملەكەت باسشىسى نۇرسۇلتان ءابىش ۇلى نازاربايەۆتىڭ تاپسىرماسىنا سايكەس بارلىق باعىتتا دا جۇمىس قارقىنىن كۇشەيتۋىمىز كەرەك. بۇگىنگى كۇنى ءبىزدىڭ الدىمىزعا بەس ينستيتۋتسيونالدى رەفورمانى جۇزەگە اسىرۋ باعىتىنداعى جاڭا مىندەتتەر قويىلىپ وتىر. 60 جانە 61 قادامعا سايكەس ءبىز ءسۇت جانە ءسۇت تاعامدارى ءوندىرىسىن، ەت جانە ەت وڭدەۋ ءوندىرىسىن دامىتۋ ءۇشىن ستراتەگيالىق ينۆەستورلار تارتۋىمىز قاجەت.

قازىرگى كەزدە «سىباعا» باعدارلاماسى بويىنشا كورسەتكىشتەرىمىز تومەن. الماتى قالاسى ماڭىندا ازىق-تۇلىك بەلدەۋىن دامىتۋ باعدارلاماسى ءالى كۇنگە دەيىن اياقتالعان جوق. بەلدەۋدى جانە ءسۇت قابىلداۋ پۋنكتتەرىن، مال بورداقىلاۋ الاڭدارىن قۇرۋ جونىندەگى تاپسىرمالاردى ورىنداۋدا ناتيجە بايقالمايدى»، - دەپ كەمشىلىكتەردى اتاپ ءوتتى.

مۇنان سوڭ ءوڭىر باسشىسى ءوندىرىس كولەمىن ارتتىرۋ، يندۋستريالاندىرۋ كارتاسى شەڭبەرىندەگى نىسانداردى ىسكە قوسۋ، تۋريزمدى دامىتۋ، «ۇلتتىق چەمپيون» باستاماسىنا نازار اۋدارۋ، «قازاقستاندا جاسالعان» اكتسياسىن جالعاستىرۋ سياقتى ءبىرقاتار ماسەلەلەرگە نازار اۋداردى.

«ءبىلىم بەرۋ، دەنساۋلىق ساقتاۋ جانە حالىقتى الەۋمەتتىك قورعاۋ ماسەلەسى - تۇراقتى باقىلاۋدى قاجەت ەتەتىن سالا. ءبىلىم سالاسىندا الدىمىزدا وقۋ ساپاسىن ارتتىرۋ، مەكتەپكە دەيىنگى مەكەمەلەر سانىن كوبەيتۋ مىندەتى تۇر. دەنساۋلىق سالاسىندا دا كەمشىلىكتەر كوپ. مەديتسينالىق قىزمەت كورسەتۋ ساپاسىنىڭ تومەندىگىنە شاعىم كوپ تۇسەدى، ماتەريالدىق-تەحنيكالىق بازالار ەسكىرگەن. كادر جەتىسپەۋشىلىگىن شەشۋ ءۇشىن جاس ماماندارعا ارناپ ءۇي سالىپ، جاعدايىن جاساۋ كەرەك. نەگە وسىنداي ۇسىنىستاردى ايتپايسىزدار؟ جەكە مەنشىك مەديتسينالىق مەكەمەلەر جۇمىسىن دا دامىتۋ كەرەك، سوندا باسەكە ورناپ، قىزمەت كورسەتۋ ساپاسىن جاقسارتۋعا ىقپال ەتەتىن بولادى. الەۋمەتتىك قورعاۋ سالاسىندا جۇمىس ورىندارىن ساقتاپ قالۋ، جۇمىسشىلاردى جۇمىستان بوساتۋعا جول بەرمەۋ، ەڭبەكاقى قارىزدارىنىڭ بولماۋىن باستى نازاردا ۇستاۋ قاجەت»، - دەدى.

جيىن قورىتىندىسىندا وبلىس اكىمى ا. باتالوۆ بيىلعى جىلى وبلىستا ءبىرقاتار باعىتتار بويىنشا ءوسىم بار ەكەنىن، دەگەنمەن جۇمىس قارقىنىن باسەڭدەتپەي، II توقسانعا ارنالعان مىندەتتەردى ورىنداۋعا بەل شەشە كىرىسۋ قاجەتتىگىن ەسكەرتتى. وسى ماقساتتا ورىنباسارلارى مەن وبلىستىق باسقارمالار باسشىلارىنا، اۋدان، قالا اكىمدەرىنە ناقتى تاپسىرمالار بەردى.

«ءبىزدىڭ الدىمىزدا بەس ينستيتۋتسيونالدى رەفورمانى جۇزەگە اسىرۋ جولىندا 100 ناقتى قادامدى ورىنداۋ مىندەتى تۇر. رەسپۋبليكالىق ءىس-شارالار جوسپارىنا سايكەس 43 تارماقتان تۇراتىن وبلىستىق جوسپار قابىلدادىق. وسى تارماقتاردىڭ ءارقايسىسى ناقتى باسقارمالار مەن اۋدان، قالا اكىمدەرىنە بەكىتىلدى. ەندى وسى بەس باعىتتا جۇمىس ىستەيتىن بەس جۇمىس توبىن قۇرىپ، جۇمىسشى ورگاندارىن انىقتاۋىمىز كەرەك. سونداي-اق جىل سوڭىندا ءاربىر اكىمنىڭ جۇمىسىن مەملەكەتتىك باعدارلامالاردىڭ ورىندالۋ بارىسىنا، 100 ناقتى قادام مىندەتتەرىنىڭ جۇزەگە اسىرىلۋىنا بايلانىستى جاسالعان رەيتينگ بويىنشا باعالايتىن بولامىز»، - دەدى.