ا ق ش، گەرمانيا، وڭتۇستىك كورەيا جانە ءۇندىستان تۋريستەرى ەلىمىزدە 4 كۇن بولادى

استانا. قازاقپارات - eQonaq اقپاراتتىق جۇيەسىنىڭ دەرەگىنە سايكەس، ا ق ش، گەرمانيا، وڭتۇستىك كورەيا جانە ءۇندىستاننان كەلگەن تۋريستەر ەلىمىزدە ورتا ەسەپپەن 4 كۇن وتكىزەدى، دەپ حابارلايدى قازاقپارات ءتىلشىسى مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

ەلىمىزدە ساياحاتتاۋ مەرزىمى بويىنشا وزبەكستان تۋريستەرى كوش باستاپ تۇر. كورشى ەلدىڭ ازاماتتارى قازاقستاندا 10 كۇنگە دەيىن توقتايدى.

ال، رەسەيلىك تۋريستەر 6 كۇن، بەلارۋس ازاماتتارى 5 كۇن، گەرمانيا تۋريستەرى 4 كۇن بولسا، قىتاي ازاماتتارى ەلىمىزدە 3,5 كۇن وتكىزەدى ەكەن.

«eQonaq جۇيەسى - ەلىمىزگە كەلگەن تۋريستەر اعىنىن باقىلاۋ جانە تالداۋ، ورنالاستىرۋ ورىندارىنىڭ ءتىزىلىمىن قۇرۋ جانە تاعى باسقا بىرنەشە ماڭىزدى فۋنكتسيانى ورىندايدى. باستى ماقسات - تۋريستەرگە كورسەتىلەتىن قىزمەتتەردىڭ اشىقتىعى مەن ساپاسىن ارتتىرۋ. جۇيەگە 3214 ورنالاسۋ قىزمەتىن ۇسىناتىن كاسىپكەرلىك نىسانى تىركەلگەن»، - دەدى مادەنيەت جانە سپورت مينيسترلىگىنىڭ باسپا ءسوز حاتشىسى ءمولدىر ابدۋاليەۆا.