قالالىق №2-سوتى باسپا ءسوز قىزمەتىنىڭ مالىمەتىنە سۇيەنسەك، سوتتالۋشىلار مەتال سىنىقتارىن قابىلداۋ پۋنكتىنە وتكىزۋ ءۇشىن زيراتتاردى ءبۇلدىرىپ كەلگەن.
«وسكەمەننىڭ ىرگەسىندەگى گلۋبوكوە اۋدانى ستەپنوە اۋىلىندا تۇراتىن م. ەسىمدى ازامات قىلمىستىق ارەكەتىن ويلاستىرعان سوڭ تانىسى ۋ- مەن ءسوز بايلاسادى. ۇلان اۋدانى قاسىم قايسەنوۆ كەنتىندە تۇراتىن وعان جوسپارىنىڭ بۇگە-شىگەسىن تۇسىندىرگەن سوڭ ەكەۋى ىسكە كىرىسكەن. ايىپتالۋشىلار ءبىر ايدىڭ ىشىندە قالاداعى 7 زيراتتى بۇلدىرگەن»، - دەلىنگەن اقپاراتتا.
سوت وتىرىسىندا ەر ادامدارعا ق ر قىلمىستىق كودەكسىنىڭ 314-بابى (توپ بولىپ الدىن الا ءسوز بايلاسىپ، جەرلەۋ ورىندارىن بىرنەشە رەت ءبۇلدىرۋ جانە قورلاۋ) جانە 188-بابى (ۇرلىق) بويىنشا ايىپ تاعىلدى. سوتتالۋشىلار ءوز كىنالارىن تولىقتاي مويىنداعان. سوت شەشىمىمەن ولار ءتورت جىلعا باس بوستاندىعىنان شەكتەلدى.
ەسكە سالساق، وسكەمەندە زيراتتاردى بۇلدىرگەن ەكى ەر ادام ۇستالعانىن حابارلاعان ەدىك.
اۆتور
تالعاتجان مۇحامەتبەك ۇلى