پاۆلوداردان 4 مىڭنان استام اقتالماعان ساياسي قۋعىن-سۇرگىن قۇرباندارى انىقتالدى

پاۆلودار. قازاقپارات - ساياسي قۋعىن-سۇرگىن قۇرباندارىن اقتاۋ ماسەلەلەرى جونىندەگى وڭىرلىك كوميسسيانىڭ جانە ونىڭ جۇمىس توپتارىنىڭ جۇرگىزگەن جۇمىستارىنىڭ ەسەبى جاريالاندى، دەپ حابارلايدى قازاقپارات.

وڭىرلىك كوميسسيا قۇرامىندا جىل بويى 11 باعىت بويىنشا 6 جۇمىس توبى جۇمىس ىستەگەن.

«كوميسسيا وتكەن عاسىردىڭ 20-50 -جىلدارىنداعى قۋعىن-سۇرگىن قۇرباندارىن قۇقىقتىق جانە ساياسي اقتاۋ ءۇشىن ارحيۆ ماتەريالدارىن، تاريحي دەرەككوزدەر مەن قۇجاتتاردى زەرتتەۋ بويىنشا دايەكتى جۇمىس جۇرگىزۋدە»، - دەدى پاۆلودار وبلىستىق اقپارات جانە قوعامدىق دامۋ باسقارماسىنان.

باسقارمانىڭ مالىمدەۋىنشە، جۇمىس توپتارى جۇرگىزگەن زەرتتەۋ ناتيجەسىندە پاۆلودار وبلىسىنىڭ مۇراعاتتارىندا 449 قور، 2907 ءىس، 4002 اقتالماعان ازامات انىقتالدى.

«اعىمداعى جىلدىڭ قىركۇيەك ايىندا پاۆلودار وبلىسى پروكۋراتۋراسىنا قاراۋ ءۇشىن حات جانە 460 اقتالماعان ساياسي قۋعىن- سۇرگىن قۇرباندارىنىڭ ءتىزىمى جىبەرىلدى. بۇل باعىت بويىنشا جۇمىس جالعاسۋدا»، - دەدى باسقارمادان.

وبلىس بويىنشا 51 جاپپاي جەرلەۋ ورىندارى انىقتالدى. ءبىلىم بەرۋ باسقارماسىنىڭ «اقپاراتتىق تەحنولوگيالار كوللەدجىنىڭ» تەحنيكالىق قولداۋىمەن ساياسي قۋعىن-سۇرگىن جانە اشتىق قۇرباندارىنىڭ جەرلەۋ ورىندارىنىڭ ينتەراكتيۆتى كارتاسىن قۇراستىرۋ بويىنشا جۇمىس باستالدى.

ايتا كەتەيىك، 2023 -جىلى ەكىنشى جۇمىس توبىنىڭ باعىتتارى بويىنشا ساياسي قۋعىن-سۇرگىن قۇرباندارى تۋرالى دەربەس مالىمەتتەرگە باسا نازار اۋدارا وتىرىپ، مۇراعاتتىق قۇجاتتار مەن ماتەريالدار جيناعىن شىعارۋ جوسپارلانۋدا.