ەكى بريتاندىق جانە ەكى امەريكالىق جاپونياعا اقپان- مامىر ايلارى ارالىعىندا توكيو ويىندارى وتەتىن ورىندارداعى ەلەكتر گەنەراتورلارىنا تەحنيكالىق قىزمەت كورسەتۋ ءۇشىن كەلگەن. پوليتسيانىڭ حابارلاۋىنشا، 2-شىلدەدە تورتەۋى دە كەشكى ساعات 20.00-دەن باستاپ ەل استاناسىنداعى روپپونگي اۋدانى ورتالىعىنداعى باردا ىشىمدىك ىشكەن. ودان شىققاننان كەيىن، كۇدىكتىلەردىڭ ءبىرى رۇقساتسىز جاقىن ماڭداعى پاتەرگە كىرگەن. ءتارتىپ ساقشىلارىنىڭ سوزىنە قاراعاندا، تورتەۋىنە جۇرگىزىلگەن ەسىرتكى سىناعى كوكاين قولدانۋدى انىقتادى.
سەيسەنبىدە وتكەن باسپا ءسوز ءماسليحاتىندا وليمپيادا ءمينيسترى تامايو مارۋكاۆا: «ەگەر ولاردىڭ قىلمىسى راستالسا، بۇل ويىندار يميدجىنە نۇقسان كەلتىرەتىن وقيعا. بۇل شىنىمەن دە وكىنىشتى»، - دەپ اتاپ ءوتتى.
كۇدىككە ىلىنگەندەردىڭ تورتەۋى دە توكيودا ورنالاسقان Aggreko Events Services Japan، شەتەلدىك ەلەكتر گەنەراتورلار فيرماسىنىڭ جەرگىلىكتى ەنشىلەس كاسىپورنىنىڭ قىزمەتكەرلەرى. كومپانيا بۇلاردىڭ قىزمەتىنەن بوساتىلعانىن حابارلادى. ويىنداردى ۇيىمداستىرۋشىلار Aggreko Events Services Japan كومپانياسىنا الداعى ۋاقىتتا مۇنداي كەلەڭسىز جاعدايلاردى بولدىرماۋدى ەسكەرتتى.