زارداپ شەككەن ءبىر جۇمىسشى ۇيىنە جىبەرىلدى، دەپ حابارلايدى قازاقپارات ءتىلشىسى.
توتەنشە جاعدايلار قىزمەتىنە حابارلاما 30-جەلتوقسان كۇنى ساعات 21:21-دە ءتۇستى. وقيعا ورنىندا ءتورت جۇمىسشى كوز جۇمدى. ءبىر جۇمىسشىنى ءورت ءسوندىرۋ كومپانياسىنىڭ قىزمەتكەرى امان الىپ شىققان. قازىرگى كەزدە ول ۇيىنە جىبەرىلدى. ال وزگە جۇمىسشىلاردىڭ دەنەسى تاڭعى ساعات 5:30-دا 1,5 شاقىرىم تەرەڭدىكتەن جەر بەتىنە شىعارىلدى.
وبلىستىق ت ج د حابارلاۋىنشا، تاڭعا دەيىن وقيعا ورنىندا تەرگەۋ جۇرگەن. سونىمەن بىرگە جارىلىس كەزىندە ءورت بولعانى انىقتالدى.
«كەن ورنىنداعى جارىلىس - قالىپتى جۇمىس. جارىلىس جاساپ، كەن يگەرىلەدى. ءبىر ايتا كەتەرلىگى، قازا بولعان جۇمىسشىلاردىڭ دەنەسىندە ەشقانداي بەلگى انىقتالمادى. ياعني، ۇستىنە اۋىر زات قۇلادى دەپ ايتا المايمىز. قازىر تەرگەۋ ءجۇرىپ جاتىر. كوز جۇمعان ادامداردىڭ ەكەۋى جارىلىس جاساۋشى، بىرەۋى جۇرگىزۋشى جانە تاعى بىرەۋى ءوندىرىس شەبەرى. جاسى ۇلكەنى 43 جاستا، وزگەسى 39، 37 جانە 35 جاستا. كوميسسيا قۇرامىندا جەرگىلىكتى اتقارۋشى ورگان وكىلى، ەڭبەك ينسپەكتسياسى، وبلىستىق يندۋستريالدىق- يننوۆاتسيالىق دامۋ باسقارماسى مەن قۇقىق قورعاۋ ورگاندارىنىڭ وكىلى بار»، - دەدى وبلىستىق ت ج د باستىعىنىڭ ورىنباسارى قايرات قاسىم.
اقتوبە وبلىستىق پ د باسپا ءسوز قىزمەتىنىڭ حابارلاۋىنشا، قازىرگى كەزدە قىلمىستىق كودەكستىڭ «ەڭبەكتى قورعاۋ قاعيدالارىن بۇزۋ» بابى بويىنشا ءىس قوزعالىپ، تەرگەۋ ءجۇرىپ جاتىر.
اۆتور: التىناي ساعىندىقوۆا