قىتايدا 4- ءساۋىر كوروناۆيرۋس قۇرباندارىن ازا تۇتۋ كۇنى بولىپ جاريالاندى
مۇنداي شەشىمدى ق ح ر مەملەكەتتىك كەڭەسى قابىلدادى، دەپ حابارلايدى قازاقپارات «شينحۋا» اگەنتتىگىنە سىلتەمە جاساپ.
سەنبى كۇنى جەرگىلىكتى ۋاقىت بويىشا ساعات 10:00 دەن باستاپ ءۇش مينۋت بويى قىتاي حالقى قايتىس بولعانداردى ۇنسىزدىكپەن ەسكە الادى.
ەلدە بارلىق تۋلار تومەن ءتۇسىرىلىپ، قوعامدىق كوڭىل كوتەرۋ شارالارى توقتاتىلادى. سونداي-اق اۆتوكولىكتەر، پويىزدار مەن كەمەلەردىڭ دىبىس بەلگىلەرىن بەرەدى، سيرەنانىڭ داۋسى ەستىلىپ تۇرادى.
وتكەن تاۋلىكتە قۇرلىقتىق قىتايدا 4 ادام كوروناۆيرۋستان كوز جۇمدى، اۋرۋ جۇقتىرعاندار سانى 31 ادامعا ارتقان، تاعى 163 ادام ەمدەلىپ شىقتى، دەپ حابارلادى ق ح ر دەنساۋلىق ساقتاۋ ىستەرى جونىندەگى مەملەكەتتىك كوميتەتى.
بۇعان دەيىن حابارلاعانداي، 1- ساۋىردەن باستاپ قىتايدىڭ مەديتسينا بيلىگى ەلدەگى كوروناۆيرۋستىق جاعدايدىڭ كۇندەلىكتى بيۋللەتەنىنە اۋرۋ بەلگىلەرى جوق ينفەكتسيالار ەنگىزە باستادى.
«2020-جىلعى 2- ساۋىردەگى جاعداي بويىنشا قۇرلىقتىق قىتايدا كوروناۆيرۋستىڭ 60 اۋرۋ بەلگىلەرى جوق جاڭا جاعدايى تىركەلگەن، ونىڭ ىشىندە 7 ءۋى سىرتتان اكەلىنگەن. قازىرگى ۋاقىتتا مەديتسينالىق باقىلاۋدا 1027 اۋرۋ سيمپتومدارى جوق ناۋقاس بار»، - دەلىنگەن جۇما كۇنى جاريالانعان ۆەدومستۆو بيۋللەتەنىندە.
سوڭعى رەسمي دەرەكتەر بويىنشا، قۇرلىقتىق قىتايدا كوروناۆيرۋس جۇقتىرعانداردىڭ جالپى سانى 81,6 مىڭ ادامعا جەتتى، ولاردىڭ 76,5 مىڭى ساۋىعىپ شىقسا، 3322 ءسى كوز جۇمعان.