كۇرەس تۇرلەرى فەدەراتسياسىنىڭ باسپا ءسوز قىزمەتى ءمالىم ەتكەندەي، اتالعان دوداعا الەمنىڭ 11 ەلىنەن ەڭ تاڭداۋلى بالۋاندار باق سىنادى. اتالعان دودادا نۇرىم دۇيسەنوۆ باپتايتىن ەلىمىزدىڭ گرەك-ريم كۇرەسى شەبەرلەرى ءتورت سالماق دارەجەسىندە توپ جاردى.
جارىستىڭ العاشقى كۇنى كىلەمگە شىققان بالۋاندار اراسىندا 55 كەلى سالماقتا ەل نامىسىن قورعاعان جانسەرىك سارسەنبيەۆ گران-پري جەڭىمپازى اتاندى. جانسەرىك ءبىرىنشى بەلدەسۋدە ۆەنگريالىق بالۋاندى 10:1 ەسەبىمەن ۇتسا، ودان كەيىن 8:0 ەسەبىمەن قىتاي بالۋانىنىڭ مىسىن باسىپ، اقتىق سىنعا شىقتى. ءدال وسى سالماقتا كۇرەسكەن قازاقستاننىڭ تاعى ءبىر بالۋانى قورلان جاقانشا دا ىرىكتەۋ سايىستارىن ءساتتى وتكىزىپ، فينالعا جولداما العان ەدى. ءسويتىپ، 55 كەلى سالماقتىڭ باس جۇلدەسى قوس بالۋانىمىزدىڭ اراسىندا ساراپقا سالىنىپ، جەڭىس جانسەرىكتىڭ ەنشىسىنە جازىلدى.
گران-پري تۋرنيرىنىڭ ەكىنشى كۇنى قورجىنىمىزعا تاعى ءۇش التىن مەدال ءتۇستى. 67 كەلى سالماقتا كۇرەسكەن مەيىرجان شەرماحانبەت پەن 77 كەلىدەگى تامەرلان شادۋكايەۆ جانە اسا اۋىر سالماقتاعى (130 كەلى) نۇرماحان تىناليەۆكە ۆەنگريا جەرىندە قارسىلاس شاق كەلمەدى. بيىلعى قازاقستان چەمپيوناتىندا توپ جارعان وڭتۇستىك قازاقستاندىق مەيىرجان شەرماحانبەت فينالدا مۇحامەدرەزا گەرايدى 6:3 ەسەبىمەن جەڭدى. يراندىق بالۋان العاشقى اينالىمدا المات كەبىسبايەۆتى 10:9 ەسەبىمەن قاپى قالدىرعان ەدى. المات ءوز كەزەگىندە 67 كەلىنىڭ قولا مەدالىن يەلەندى.
77 كەلىدە ونەر كورسەتكەن تامەرلان شادۋكايەۆ فينالدا جارىس قوجايىنىنان باسىم ءتۇستى. ال، 130 كەلىدەگى نۇرماحان تىناليەۆ بولسا، فينالدا قىتاي بالۋانىنان ايلاسىن اسىردى. نۇرماحان اقتىق سىنعا دەيىن ۆەنگريانىڭ ەكى بالۋانىن جانە قىرعىز بالۋانىن ۇتتى.
وكىنىشكە قاراي، گران-پري تۋرنيرىنىڭ باس جۇلدەسىن ساراپقا سالعان 97 كەلىدەگى ەرۇلان ىسقاقوۆ ۆەنگريالىق بالۋانمەن 3:3 ەسەبىمەن تەڭ تۇسكەنىمەن، ءادىس قولدانۋ بارىسى جوعارى بولعاندىقتان قارسىلاسىنىڭ جولى بولىپ كەتتى.
قورجىنىمىزعا تۇسكەن ءۇش قولا مەدال - المات كەبىسبايەۆ (67 كەلى)، دەمەۋ جادىرايەۆ (72 كەلى) جانە ميراس بارشىلىقوۆتىڭ (77 كەلى) ەنشىسىندە.
كوماندالىق ەسەپتە قازاقستان قۇراماسى يران بالۋاندارىن العا جىبەرىپ، ەكىنشى ورىنعا يە بولدى.
اۆتور: كۇنسۇلتان وتارباي