مەنينگيتكە شالدىققان 4 ناۋقاس ەمدەرىن جالعاستىرۋدا - دەنساۋلىق ساقتاۋ مينيسترلىگى
كەشە تاڭەرتەڭ ۆەدومستۆونىڭ باسپا ءسوز قىزمەتى اۋرۋحانالاردا مەنينگوكوكك ينفەكسياسىنا شالدىققان 7 ادام ەم-دوم قابىلداپ جاتقانىن حابارلاعان بولاتىن.
كەشكى ساعات 18:00-دەگى جاعداي بويىنشا، ءۇش ناۋقاس ۇيلەرىنە جىبەرىلىپ، ستاتسيوناردا 4 ادام قالعان.
جالپى قازاقستاندا جىل باسىنان بەرى مەنينگوكوكك ينفەكسياسىنىڭ 62 جاعدايى تىركەلگەن، ونىڭ 13 ى ولىممەن اياقتالعان. 45 ادام ەم-دومنان كەيىن ۇيلەرىنە شىعارىلعان.
مەنينگوكوكقا شالدىققان الماتى قالاسىندا - 6 ادام، الماتى وبلىسىندا - 3 ادام، وڭتۇستىك قازاقستان وبلىسىندا - 3 جانە قىزىلوردا وبلىسىندا 1 ادام كوز جۇمدى.
«ەپيدەمياعا قارسى ءىس-شارالار جالعاسۋدا. جاڭا جاعدايلار تىركەلگەن جوق»، - دەلىنگەن مينيسترلىك اقپاراتىندا.
مەنينگوكوكك ينفەكسياسى - وتكىر ينفەكسيالى اۋرۋ. ول باكتەريالار ارقىلى تارايدى جانە ونىڭ ءتۇرلى كلينيكالىق كورىنىستەرى بولادى. ينفەكسيانى نەگىزىنەن ناۋقاس ادامدار مەن وزگە دە ءتىرى تىرشىلىك يەلەرى تاراتادى. ولاردىڭ بارلىعىندا كلينيكالىق بەلگىلەر بولماۋى مۇمكىن. سوعان قاراماستان ولار مەنينگوكوكك ينفەكسياسىن تاراتۋشىلار بولىپ تابىلادى. بۇل ىندەت ءتۇرى ادەتتە قىس جانە كۇز مەزگىلىندە كوپ تارايدى.
ينفەكسيا جوتەل، تۇشكىرۋ، اڭگىمەلەسۋ بارىسىندا تارايدى. ينفەكسيا قوزدىرۋشىلار ادەتتە سىرتقى ورتادا تۇراقسىز كەلەدى. ميكروب اۋرۋ اداممەن ۇزاق ۋاقىت ءارى جاقىن بايلانىستى بولعان كەزدە جوعارعى تىنىس الۋ جولدارىنداعى شىرىش قاباتى ارقىلى كەلەدى. ينفەكسيا جۇقتىرىپ، اۋرۋعا شالدىققانعا دەيىنگى مەرزىم 1 دەن 10 كۇنگە دەيىنگى ارالىقتى قۇرايدى. ناۋقاس ادام اۋرۋ جۇقتىرعان العاشقى كۇننەن باستاپ-اق قاۋىپ تۋدىرادى.
بۇل اۋرۋمەن ادەتتە 5 جاسقا دەيىنگى بالالار ءجيى اۋىرادى. ويتكەنى ولاردىڭ يممۋندى جۇيەسى تولىق قالىپتاسپاعان. ال جاسوسپىرىمدەر مەن جاستار ادەتتە كوپ ۋاقىتتارىن تۇنگى كلۋبتار سياقتى حالىق كوپ شوعىرلانعان جەرلەردە وتكىزەدى. ال مۇنداي ورىندار مەن ونداعى شىلىم شەگۋ، ءبىر ىدىستان سۋسىن ءىشۋ سياقتى جايتتەر اۋرۋدى جۇقتىرۋ قاۋپىن ارتتىرا تۇسەدى.
مەنينگيت بىردەن باستالادى. الدىمەن ادامنىڭ باسى قاتتى اۋىرىپ، جۇرەگى اينىپ، 6-15 ساعاتتان سوڭ دەنەسى بورتە باستايدى. دەنە قىزۋى 39-40°س گرادۋسقا جەتىپ، قالتىرايدى. تەرىسى بوزارىپ، السىرەيدى، ارقاسى مەن قول-اياعىنىڭ ۇشتارى اۋىرا باستايدى. اۋرۋ ادام شولدەپ، اسقا دەگەن تابەتى بولمايدى. سونداي-اق بۇل اۋرۋ تۇماۋ، انگينا سياقتى اۋرۋلارعا ۇقساپ، بىلىنبەي جەڭىل ءوتۋى دە مۇمكىن. ادەتتە ادام سۋىق ءتيىپ، اۋىرىپ، قاتتى شارشاعان كەزدە ادامنىڭ ورگانيزمى السىرەيدى. مىنە، وسى كەزدە ينفەكسيانىڭ تاراۋىنا قولايلى جاعداي تۋىندايدى جانە وسى كەزدە مەنيگوكوكك ادامنىڭ ميىنا ەنىپ، ونى قابىندىرا تۇسەدى.
سونداي-اق دەنساۋلىق ساقتاۋ مينيسترلىگى اۋرۋدىڭ الدىن الۋ تۋرالى كەڭەستەرىمەن ءبولىستى.
«ءتۇرلى مادەني ءىس-شارالارعا قاتىسۋدى شەكتەپ، باسسەيىندەر مەن ويىن الاڭدارىنا ساۋدا ورتالىقتارىنا بارۋدى دوعارۋ قاجەت. تازالىق ساقتاپ، بولمەنى ءجيى جەلدەتىپ، ىلعالدى تازالىق شارالارىن ۇدايى جۇرگىزىپ وتىرعان ءجون. سونداي-اق پروفيلاكتيكالىق ماقساتتا دارىگەرگە ءجيى قارالىپ وتىرعان دۇرىس. تەك قايناتىلعان سۋ ىشكەن ءجون»، - دەيدى ۆەدومستۆو وكىلدەرى.