قىتايدا ديماش تۋرالى ماتەريالداردىڭ وقىلىمى 4 ميلليارد- قا جاقىندادى
دەپ حابارلايدى قازاقپارات.
بۇل كۇندە ديماشتىڭ قىتايلىق الەۋمەتتىك جەلىسى weibo جەكە پاراقشاسىنا جازىلۋشى جانكۇيەرلەر سانى 3 ميلليون 500 مىڭعا جاقىندادى. ال Twitter- دەن قالىسپايتىن قىتايلىق weibo الەۋمەتتىك جەلىسىندە ديماشتىڭ بىرنەشە جانكۇيەرلەر توبى قالىپتاسىپ، ءانشى ءۇشىن ءارتۇرلى شارالار ۇيىمداستىرىپ جاتىر.
بۇعان دەيىن، «护卫队»- Guardians قىتايلىق جانكۇيەرلەر توبى ديماشتىڭ تۋعان كۇنىن استاناداعى ۇلكەن LED ەكراندار ارقىلى قۇتتىقتاماققا نيەتتەنىپ جاتقانىن حابارلاعان ەدىك. ولاردىڭ ايتۋىنشا، بۇل شارا قازىرگى تاڭدا استاناداعى كورنەكتى LED ەكراندارمەن كەلىسىلىپ قويىلعان. ال 25 Dears-CN توبى 22 - ناۋرىز كۇنى الماتى قالاسىنىڭ LED- ەكراندارى ارقىلى ديماشتى جانە بارشا قازاقستاندىقتاردى ناۋرىز مەرەكەسىمەن قۇتتىقتاعان ەدى.
29 - ناۋرىزدا «迪玛希Dimash全球后援会» (ديماشتىڭ الەمدىك جانكۇيەرلەرى توبى) قىتايلىق 101 FM راديو مەديا ورتالىعى جاريالاعان بايگەدە ديماشقا كوپ داۋىس جيناپ، ديماشتىڭ بەينەسى نيۋ- يورك قالاسىنىڭ ورتالىق مانحەتتەن اۋدانىندا ورنالاسقان تايم سكۆەر الاڭىنداعى ۇلكەن LED ەكرانىندا كورسەتۋ قۇرمەتىنە يە بولدى.
2 - ساۋىردە «迪玛希公益站» Dearest (ديماش قايىرىمدىلىق توبى) قىتايدىڭ تيانجين قالاسىنداعى «SOS» بالالار ءۇيىنىڭ تاربيەلەنۋشىلەرىنە قاراجات جيناپ، ديماشتىڭ اتىنان زاتتاي كومەك جاسادى. 11- ساۋىردە شاڭحاي قالاسىنىڭ تۇرعىنى ديماش قۇدايبەرگەننىڭ «Singer2017» ءان بايقاۋىنىڭ ءبىرىنشى كەزەڭىندە كيگەن ساحنالىق كيىمىن 158890 يۋانعا (7,2 ميلليون تەڭگە) ساتىپ العان.
ساتىپ الۋشى قىتايلىق قىز ءوزىنىڭ weibo جەكە پاراقشاسىندا (@SophieSSJ1115) ديماشقا جانە ءوزى سياقتى بارلىق جانكۇيەرلەرگە العىس ايتتى. ءوزىنىڭ شىعارعان اقشاسىنىڭ كومەككە ءزارۋ بالالاردىڭ جاعدايىن جاقسارتۋعا جۇمسالاتىنىنا قۋانىشتى ەكەنىن، سونداي- اق، ديماشتىڭ قىتايداعى ءبىرىنشى ساحنالىق كيىمىنىڭ ءانشى ءۇشىن ايرىقشا ماڭىزدى دەپ ويلايتىندىعىن جانە كيىمدى ديماشقا قايتا تاپسىرماق بولىپ وتىرعاندىعى تۋرالى جەتكىزگەن.
«迪玛希海外资源博» توبى ديماشتىڭ، الپامىستىڭ جانە اتا- اناسىنىڭ ينستاگرامداعى جاڭالىقتارىن دەر كەزىندە قازاق تىلىنەن قىتاي تىلىنە اۋدارىپ وتىرادى. سونداي- اق، قازاقپاراتتىڭ ديماش تۋرالى قازاقشا، ورىسشا جانە قىتايشا اقپاراتتارىمەن ءبولىسىپ وتىرعان.
اۆتور: مۇحتار قاليموللا ۇلى