ەلۋ مىڭ تەڭگە پارا العان شەنەۋنىك 4 ميلليون ايىپپۇل تولەيدى
قاراعاندى قالاسىنىڭ قازىبەك ءبي اۋداندىق سوتىنان حابارلاعانداي، بۇرىنعى شەنەۋنىك قانات ساقيەۆ 50 مىڭ تەڭگە كولەمىندە پارا العانى ءۇشىن ايىپتى دەپ تانىلدى. ول بۇل قارجىنى فارماتسيەۆتيكالىق فيرمانىڭ وكىلىنەن ەگۋگە ارنالعان ءدارى-دارمەكتەر قارجىسىنىڭ اۋدارىمىن جىلدامداتۋ ءۇشىن العان. سۋديا جۇماعۇل شۇجەنوۆ سوتتالۋشىنى ايىپتى دەپ تانىپ، ايىپپۇل رەتىندە جازا تاعايىندادى.
بۇرىنعى شەنەۋنىك ءوز كىناسىن تولىق مويىنداپ، وكىندى. ول پروكۋرورمەن پروتسەسسۋالدىق كەلىسىم جاساپ، تاراپتار ايىپپۇل تولەۋ جازاسىنا توقتادى. «سوت سوتتالۋشىنى پارا العانى ءۇشىن ايىپتى دەپ تانىپ، 70 ەسەلەنگەن سومادا، ياعني 4200000 تەڭگە كولەمىندە ايىپپۇل تولەۋگە ۇكىم شىعاردى. سوتتالۋشىنىڭ مۇلكى تاركىلەنۋگە جاتادى. قوسىمشا جازا رەتىندە ول ءومىر بويىنا مەملەكەتتىك قىزمەتتە جۇمىس جاساۋ قۇقىعىنان شەتتەتىلدى»، - دەپ ۇكىم ەتتى سۋديا جۇماعۇل شۇجەنوۆ.
ەكس-شەنەۋنىككە ايىپپۇلدى ءوز ەركىمەن وتەۋ ءۇشىن ءبىر اي ۋاقىت بەرىلدى. ودان كەيىن سوت پروكۋروردىڭ نارازىلىعىمەن ايىپپۇلدى باس بوستاندىعىنان ايىرۋ جازاسىنا اۋىستىرۋعا قۇقىلى.