ساكەن مايعازيەۆ 4 بالالى وتباسىنا ۇلكەن كومەك كورسەتتى - فوتو

استانا. قازاقپارات - قازاقستان رەسپۋبليكاسىنىڭ مادەنيەت قايراتكەرى، ەڭبەك سىڭىرگەن قايراتكەر، «دارىن» سىيلىعىنىڭ يەگەرى، ءانشى، «مۋزارت» توبىنىڭ وكىلى ساكەن مايعازيەۆ قاسيەتتى رامازان ايىندا كوپ بالالى وتباسىعا ۇلكەن كومەك كورسەتكەن. بۇل تۋرالى «ساداقا» قورى حابارلاپ وتىر.

«وتىز كۇنگە وتىز ىزگى امال» جوباسىنىڭ اياسىندا ءانشى ساكەن مايعازييەۆ الەۋمەتتىك جاعدايى تومەن 4 بالالى وتباسىعا قۋانىش سىيلادى. ساكەن اعا 1 ايعا جەتەتىن ازىق- تۇلىكپەن قوسا، كيىم- كەشەك جانە ءبىر قوي سويىپ اپاردى. وتباسىنداعى سال دەرتىنە شالدىققان بالاعا ارنايى اياق جاتتىقتىرۋىنا ارنالعان كولىك (ماشينا) قاجەت بولعانىن ەستىگەن ساكەن مايعازيەۆ جومارتتىق تانىتىپ، سول جەردە كولىك الۋعا قاراجاتىن دا تاپسىردى»، - دەپ حابارلانعان قوردىڭ رەسمي پاراقشاسىندا.

«ءبىزدىڭ جوبامىزعا قاتىسىپ، مۇقتاج وتباسىعا كومەك بەرىپ، ەلگە قۋانىش سىيلاپ جۇرگەن اعامىزدىڭ اتىن اتاپ، جاقسىلىعىن جاريا ەتۋ سەبەبىمىز، ەلگە ۇلگى، جاقسىلىققا تۇرتكى بولاتىن ىزگى باستاماعا اينالسىن دەگەن ۇلكەن ءۇمىت، جاقسى نيەت جاتىر»، - دەپ تولىقتىرىپ وتىر قايىرىمدىلىق قورىنىڭ قىزمەتكەرلەرى.

     

اۆتور: كەنجەكەي توقتامۇرات قىزى