قىتايدان كەلگەن قازاق قىزىنا «قازاقستان داۋىسىندا» 4 تالىمگەر تالاسىپ قالدى - فوتو، كەسكىن

استانا. قازاقپارات - قىتايدا تۇراتىن ءانشى ءجاننات ءادىلحان قىزى «قازاقستان داۋىسى» جوباسىندا باق سىناۋدا. ىرىكتەۋ كەزەڭىنەن ىركىلمەي وتكەن ءانشى قىزدىڭ الداعى جەكپە-جەكتەرگە دايىندىعىن تەلەفون ارقىلى سۇراپ بىلدىك.

«قازاقستان داۋىسىنا» قاتىسۋدى ارعى بەتتە ءجۇرىپ اڭساعان ءجانناتتىڭ ارماندارى ورىندالىپ كەلەدى. «قازاقستان داۋىسى» II ماۋسىمى جەڭىمپازدارىنىڭ قىتايدا ونەر ساپارىندا بولۋى ءانشى قىزدىڭ وسى ءدۇبىرلى دودادا ونەر كورسەتۋىنە مۇمكىندىك تۋعىزعان كورىنەدى.

اتاجۇرتقا تابانى تۇڭعىش تيگەن قانداسىمىز قازىرگى كەزدە قازاق ەلىندەگى ەكى بىردەي جوباعا دايىندالىپ جاتقانىن جەتكىزدى.

«بۇل جولى ۇلتتىق ارنانىڭ «قازاقستان داۋىسى» مەن kz .Qamshy پورتالىنىڭ «قازاق داۋىسى» جوبالارىنا بىردەي قاتىسىپ جاتىرمىن. «قازاقستان داۋىسىندا» ەكىنشى كەزەڭگە جولداما السام، «قازاق داۋىسىندا» الدىڭعى 25 ءانشىنىڭ قاتارىنا ەندىم»، - دەيدى ءجاننات ءادىلحان قىزى.

21 جاستاعى جاس ءانشىنىڭ ۇلكەن ساحناعا شىعۋى وتكەن جىلى ۇرىمجىدەگى «شىڭجاڭ» تەلەارناسىنىڭ ۇيىمداستىرعان «كۇمىس كومەي» ءان بايقاۋىنان باستاۋ العان ەكەن. بايقاۋدا 90 سايىسكەردىڭ اراسىنان فينالعا دەيىن جەتىپ، 10 ۇزدىك ءانشىنىڭ قاتارىنان كورىنگەن ءجاننات ىلە-شالا قىتاي ورتالىق تەلەارناسىنىڭ (CCTV) بەيجىڭدە وتكىزگەن «شارىقتاسىن ءانىمىز» اتتى بايقاۋدا دا توپ جارىپتى.

ميللياردتار ەلىندە قازاقتىڭ ونەرىن تانىتىپ جۇرگەن ءانشى قىز كۇنى كەشە شانشي تەلەارناسىنىڭ وتكىزگەن ۇلكەن سايىسىنا قاتىسا ءجۇرىپ «قازاقستان داۋىسىنا» قاتىسۋعا جولى تۇسكەنىن ايتادى.

«ونەردەگى ۇلكەن جولىمدى اشقان «كۇمىس كومەي» ءان بايقاۋىنان سوڭ قىتايداعى 7 ۇلتتىڭ انشىلەرى قاتىسقان جوبادا دا باعىمدى سىنادىم. وندا دا 70 ءانشىنىڭ ىشىنەن فينالعا دەيىن جەتىپ، «ءان پاتشاسى» اتاعىنا يە بولدىم. وسىعان ۇقساس شانشي تەلەارناسىنىڭ «ءان حۋانحىدان باستالادى» اتتى بايقاۋىنا قاتىسىپ، 2-ورىندى يەلەندىم. 200 دەي ونەرپاز باسەكەگە تۇسكەن ءىرى جوبا جاقىندا عانا اياقتالدى. ەندى اتاجۇرتتا ءوتىپ جاتقان جوعارىداعى ەكى سايىسقا دايىندالۋدامىن»، - دەيدى ول.

كىشكەنتايىنان انگە اۋەس، كۇيگە قۇمار بولىپ وسكەن ءجاننات وزىندەگى تالانتتى ناعاشى جۇرتىنان دارىعان دەپ ەسەپتەيدى. «اتا-انام قاراپايىم اۋىل ادامدارى. ال، ناعاشىلارىمنان ءانشى، كۇيشىلەر كوپتەپ شىققان. سودان دا بولار بالا جاسىمنان ءانشى بولۋدى ارماندادىم. جوعارعى وقۋ ورنىندا ءداستۇرلى ءانشى ماماندىعىن ءبىتىردىم. قازىر دە وسى سالا بويىنشا كۇيتىڭ فيلارمونياسىندا جۇمىس جاسايمىن»، - دەيدى ج. ءادىلحان قىزى.

قازاق ونەرىن جالعاستىرىپ قانا قويماي، ونى الەمگە تانىتۋدى ماقسات تۇتقان ءانشى قىزدىڭ الداعى ساپارىنا ءبىز دە ساتتىلىك تىلەدىك.

ايتا كەتەيىك، قازىرگى كەزدە «قازاقستان» ۇلتتىق تەلەارناسىندا «قازاقستان داۋىسى» جوباسىنىڭ 3 ماۋسىمى باستالدى. وتكەن جەكسەنبىدە ىرىكتەۋ كەزەڭىن وتكىزگەن جوبا، الداعى اپتادا «شايقاس» كەزەڭىنە وتەتىن بولادى.

مايگۇل سۇلتان،

BAQ.kz
كەسكىن «قازاقستان ۇلتتىق» ارناسىنان الىندى