پاۆلودار وبلىسىندا 4 ەلىكتى اتىپ العان براكونەرلەر سوتتالدى
08:17, 24 - ناۋرىز 2015
استانا. قازاقپارات - پاۆلودار وبلىسىنىڭ ءۇش تۇرعىنى ەرتىس وزەنىنىڭ اڭعارىنداعى ەرەكشە قورعالاتىن اۋماقتان 4 ەلىكتى اتىپ ولتىرگەنى ءۇشىن سوتتالدى.
«وتكەن جىلدىڭ قازان ايىندا ت.، ف. جانە د. اقسۋ قالاسىنىڭ اقسۋ سەلولىق ايماعىندا ورنالاسقان ەرەكشە قورعالاتىن تابيعي اۋماققا جاتاتىن ەرتىس وزەنى اڭعارىندا بولدى. ولار زاڭسىز اڭشىلىق ناتيجەسىندە 4 ەلىكتى اتىپ ءولتىرىپ، «پاۆلودار ورمان جانە جانۋارلار الەمىن قورعاۋ مەكەمەسى» مەملەكەتتىك مەكەمەسىىنە 740800 تەڭگە كولەمىندە ماتەريالدىق زالال كەلتىردى. سوتقا دەيىنگى ءوندىرىس بارىسىندا سوتتالۋشىلار ماتەريالدىق زياندى تولىق وتەدى»، - دەلىنگەن حابارلامادا.
سوت ۇكىمىمەن ۇشەۋى دە قىلمىس جاساۋعا ايىپتى دەپ تانىلىپ، ولارعا 200 ايلىق ەسەپتىك كورسەتكىش مولشەرىندە ايپپۇل تۇرىندە جازا تاعايىندالىپ، ەكى جىل مەرزىمگە اڭشىلىق كاسىبىمەن اينالىسۋ قۇقىعىنان ايىرىلدى.
سوت ۇكىمى زاڭدى كۇشىنە ەنگەن جوق.