وپەراتسيا بارىسىندا ماماندار ىسىكتى اپپاراتتىڭ كومەگىمەن تىلىكسىز الىپ تاستادى. قالا اكىمدىگى باسپا ءسوز قىزمەتىنىڭ مالىمەتىنشە، ناۋقاستىڭ وكپەسىندەگى ىسىك فليۋروگرافيالىق تەكسەرۋ كەزىندە انىقتالىپ، ونكولوگيالىق ورتالىققا جولداما ارقىلى كەلگەن. وتا جاسالعان كۇنى-اق ناۋقاس جانساقتاۋ بولىمىنە ەمەس، بىردەن پالاتاعا اۋىستىرىلدى.
ونكولوگيالىق ورتالىقتا ەكى جىلدان بەرى وتانى ۆيدەوتوراكوسكوپيالىق ادىسپەن جاساۋ قولعا الىنعان.
مۇنداي وتانىڭ ارتىقشىلىعى كوپ. ناۋقاس وپەراتسيانى جەڭىل كوتەرەدى جانە اسقىنۋلار وتە سيرەك كەزدەسەدى. سونداي-اق، ناۋقاس ناركوتيكالىك انالگەتيكتەر قابىلدامايدى.
«وپەراتسيا بولعان كۇنى ناۋقاس وزدىگىنەن ءجۇرىپ، اۋرۋحانادان 3-4 كۇندە ۇيىنە شىعارىلادى. وسى ادىسپەن جاسالعان وتادان كەيىن ناۋقاس وڭالتۋدى قاجەت ەتپەيدى. مۇنداي ۆيدەوتوراكوسكوپيالىق ءادىس وكپە قۋىسى ورگاندارىنىڭ قاتەرسىز جانە العاشقى ساتىداعى قاتەرلى ىسىكتەرى كەزىندە قولدانىلادى»، - دەيدى جوعارى دارەجەلى حيرۋرگ سامات يسمايلوۆ.
ونكولوگتار قالا تۇرعىندارىنا جىلىنا ءبىر رەت فويۋروگرافيالىق تەكسەرۋدەن ءوتىپ، وكپەدەن ىسىك بەلگىلەرى تابىلعان جاعدايدا مىندەتتى تۇردە مەديتسينا ماماننىڭ كەڭەسىنە جۇگىنۋ كەرەكتىگىن ەسكەرتەدى.