قازاقستاندا جارتى جىل ىشىندە 49 بالا ءوز-وزىنە قول سالدى
بۇل تۋرالى ق ر باس پروكۋراتۋراسىنىڭ رەسمي وكىلى وكسانا لوسكۋتوۆا ءمالىم ەتتى، دەپ حابارلايدى قازاقپارات ءتىلشىسى.
«بالا - اتا-انانىڭ بار قازىناسى. ءبىراق كوپ جاعدايدا ولاردىڭ قايدا جانە كىممەن جۇرگەنىن بىلە بەرمەيمىز. بالالار سۋيتسيدى - ەشكىمدى بەي-جاي قالدىرمايتىن جانە قوعامدا ۇلكەن ۇرەي تۋدىراتىن ەرەكشە تاقىرىپ. بيىلعى جىلدىڭ ءتورت ايىندا 49 بالا ءوز-وزىنە قول سالدى. وتكەن جىلى ولاردىڭ سانى 64 بولدى. ستاتيستيكا تومەندەۋ قارقىنىن كورسەتىپ وتىرعانىمەن، بۇل پروبلەمانى شەشپەيدى»، - دەيدى ول.
رەسمي وكىلدىڭ سوزىنە قاراعاندا، سوڭعى 6 جىلدا بالالاردىڭ سۋيتسيدى 0 تومەندەگەن. پسيحولوگتاردىڭ پايىمىنشا، بۇعان ءاربىر جاعدايدا دەپرەسسيا يتەرمەلەيدى.
كوپتەگەن مەملەكەتتىك ورگاندار، سونىڭ ىشىندە باس پروكۋراتۋرا سۋيتسيدتەردىڭ الدىن الۋ باعىتىندا جۇمىستار اتقارۋدا.
«2017 -جىلى قۇقىققا قايشى كەلەتىن 1080 اقپارات انىقتالىپ، سونىڭ 170 ى الەۋمەتتىك جەلىلەردەن تابىلدى. ولار جەتكىنشەكتەردى «ءولىم ويىنىنا» شاقىرعان»، - دەپ جازدى و. لوسكۋتوۆا فەيسبۋك پاراقشاسىندا.
ونىڭ ايتۋىنشا، بيىلدىڭ وزىندە عالامتوردا 6,5 مىڭ، سونىڭ ىشىندە ءوزىن-ءوزى ولتىرۋگە ۇگىتتەگەن 93 اقپارات جويىلعان.
باس پروكۋراتۋرا وكىلى اتا-انالاردى پسيحولوگيالىق كۇيزەلىسكە تۇسپەۋى ءۇشىن بالانىڭ مىنەز-قۇلقىن ۇنەمى باقىلاپ وتىرۋعا شاقىرادى.
«ءبىز، ەرەسەكتەر بالالاردىڭ پسيحولوگياسىن تۇسىنبەۋىمىز مۇمكىن. دەگەنمەن، مىنەز- قۇلقىنىڭ وزگەرۋىن بايقاپ، كومەك بەرۋ - ءبىزدىڭ قولىمىزدا»، - دەدى ول.