49 جاستاعى ستۋدەنت

49 جاستاعى نۇرباي ماتسالايەۆ قازىر اۆتوسەرۆيستە جۇمىس ىستەيدى. بيىل كوپتەن بەرى ىشكە بۇككەن ارمانىن جۇزەگە اسىرىپ، قايتادان ستۋدەنت بولامىن دەپ شەشكەن. ءسويتىپ، اقتوبەدەگى Heriot-Watt University-عا وقۋعا ءتۇسىپتى.

ول باسقا تالاپكەرلەر سياقتى وقۋعا تۇسۋگە مۇقيات دايىندالعان. ۇ ب ت جانە تىلدىك ەمتيحان تاپسىرىپ، ۇلى بريتانيا ۋنيۆەرسيتەتىنىڭ فيليالىندا وقۋداعى العاشقى جەتىستىكتەرىنە جەتكەن.

- وقۋ تۋرالى وي ەكى-ءۇش جىل بۇرىن پايدا بولدى. مەنىڭ جەكە كاسىبىم بار. جۇمىسىم - ەلەكتروندى اۆتوموبيل جۇيەلەرىن دياگنوستيكالاۋ. ورتا تەحنيكالىق ءبىلىم بار، ءبىراق كومپيۋتەرلىك باعدارلامالاۋ سالاسىنداعى ءبىلىمىمدى ارتتىرعىم كەلەدى. سوندىقتان «كومپيۋتەرلىك ينجەنەريا» ماماندىعىن تاڭدادىم. ەندى جۇمىستى وقۋمەن بىرىكتىرۋىم كەرەك. بۇل وڭاي ەمەس، ءبىراق قالاساڭىز، ءبارى مۇمكىن، - دەيدى ن. ماتسالايەۆ.

ول وسىعان دەيىن اعىلشىن ءتىلىن مۇلدەم وقىماپتى. ءبىراق جۇمىسىنىڭ ەرەكشەلىگىنە بايلانىستى اعىلشىن تىلىندەگى قۇجاتتارمەن كوپ جۇمىس ىستەۋىنە تۋرا كەلگەن. سودان باستاپ بارلىق اقپاراتتى تەك اعىلشىن تىلىندە وقي باستاعان. ونىڭ وسى جاسقا كەلگەندە وقۋعا قۇشتارلىعىن اشقان - زايىبى. ايەلىنىڭ ارقاسىندا ءوز كۇشىن سىناپ، الەمدىك ۋنيۆەرسيتەتكە تۇسۋگە بارىن سالعان. نۇربايدىڭ زايىبى - ق. جۇبانوۆ ۋنيۆەرسيتەتىنىڭ ەكونوميكا فاكۋلتەتىندە وقىتۋشى. ول وقۋعا تۇسەردە اعايىننىڭ كوزقاراسى ءارتۇرلى بولىپتى. اعا بۋىن قابىلداي الماي، جاستار جاعى قولداعان. ول قانشا جاسقا كەلسە دە، وقيمىن دەگەن ادامعا ويلانۋدىڭ قاجەتى جوق دەپ سانايدى.

- مەن تىلدىك ەمتيحاننىڭ قيىن بولاتىنىن ءتۇسىندىم، سوندىقتان وقۋعا ءتۇسۋ قارساڭىندا اعىلشىن تىلىنەن رەپەتيتور جالداپ، قارقىندى دايىندالا باستادىم. ەڭ الدىمەن، شوتلانديا ۋنيۆەرسيتەتىنىڭ 200 جىلدىق تاريحى قىزىقتىردى. قازىر وسىنى زەرتتەپ ءجۇرمىن. سودان كەيىن ۋنيۆەرسيتەتتىڭ اشىلۋ جوباسىنىڭ اۋقىمى تاڭعالدىرادى. وسىلايشا، الەمدەگى ەڭ ۇزدىك جوعارى وقۋ ورىندارىنىڭ بىرىندە وقۋعا مۇمكىندىك الدىم. ارماندار Heriot-Watt-پەن ورىندالادى، - دەيدى ستۋدەنت.

ەستەرىڭىزگە سالا كەتەيىك، ۇلى بريتانيانىڭ ەڭ كونە جوعارى وقۋ ورنى - Heriot-Watt فيليالى بيىل اقتوبەدەگى ق. جۇبانوۆ ۋنيۆەرسيتەتى بازاسىندا اشىلعان بولاتىن. نەگىزىنەن Heriot-Watt ينجەنەرلىك كادرلار مەن IT ماماندار دايارلايدى. Heriot-Watt فيليالىنىڭ ديپلومى شەتەلدە تىزىمدەلەدى. ستۋدەنتتەر ءار جىلى ءار فيليالعا بارىپ وقيدى. مىسالى، وقۋدىڭ ءبىرىنشى كۋرسى اقتوبەدە، ەكىنشى كۋرسى شوتلانديادا وتەدى. ستۋدەنتتەر ق. جۇبانوۆ ۋنيۆەرسيتەتى ارقىلى Heriot-Watt-قا تۇسەدى، ولاردىڭ ەكى باعدارلاماسى جانە ەكى ديپلومى بولادى.

 

«ەگەمەن قازاقستان»