سۋ تاسقىنى سالدارىنان قازا تاپقاندار سانى 47 گە جەتتى. بۇل تۋرالى قازاقپارات AP باسىلىمىنا سىلتەمە جاساپ حابارلايدى.
مۋسسوندىق جاۋىن مەن وزەندەردىڭ كوتەرىلۋىنەن جاكارتا اۋداندارى مەن قالا ماڭىندا سەل بولىپ، كورشىلەس لەباكتا 10 ادام قازا تاپتى.
يندونەزيا تابيعي اپاتتىڭ سالدارىن جويۋ ۇلتتىق اگەنتتىگىنىڭ باسپا ءسوز حاتشىسى اگۋس ۆيبوۆو (Agus Wibowo) مەرت بولعاندار قاتارىندا جاڭا جىل قارساڭىندا جاۋعان نوسەر جاڭبىردان كەيىن سۋعا باتىپ كەتكەندەر مەن وزەندەر ارناسىنان اسقان كەزدە ەلەكتر توگى ءتيىپ، وپات بولعاندار بار ەكەنىن مالىمدەدى. ءۇش ادام سۋىق ءتيىپ قايتىس بولدى.
بۇل - 2007 -جىلدان بەرى بولعان ەڭ قاتتى تاسقىن، 10 كۇن ىشىندە 80 ادام قازا تاپتى.
ۆيبوۆونىڭ ايتۋىنشا، تاسقىن كەزىندە 397 مىڭ ادام ۇلكەن قالالىق اۋداندارداعى مەكەندەرگە تىعىلعان، ويتكەنى تاسقىن سۋدىڭ بيىكتىگى كەيبىر جەرلەردە 6 مەترگە (19 فۋت) جەتكەن. اگەنتتىكتىڭ مالىمەتى بويىنشا، 173 مىڭعا جۋىق ادام ءالى ۇيلەرىنە قايتا الماي وتىر، ەڭ كوپ زارداپ شەككەن - بەكاسي اۋدانىنىڭ تۇرعىندارى.
152 مىڭ ادام بۇرىنعىشا جاكارتانىڭ بەكاسي قالاسىنداعى 98 اپاتتى مەكەندە وتىر. اگەنتتىك قالانىڭ كوپ بولىگىندە سۋ ءالى 2 مەترگە جەتەتىنىن ايتتى.
ۇكىمەت سۋدىڭ تارتىلعانىن پايدالانىپ كوشەلەردى بالشىق پەن قوقىستان تازارتىپ جاتىر. ون مىڭداعان ءۇي مەن مەكەمەلەردە ەلەكتر جەلىسى قالپىنا كەلتىرىلدى.
مەتەرولوگيا، كليماتولوگيا جانە گەوفيزيكا اگەنتتىگىنىڭ باسشىسى دۆيكوريتا كارناۆاتي (Dwikorita Karnawati ) جاقىن كۇندەرى ەل استاناسىندا تاعى دا نوسەر جاۋىپ، يندونەزياداعى جاۋىن-شاشىن كەلەسى ايعا دەيىن ساقتالۋى مۇمكىن ەكەنىن ايتتى.
ۇكىمەت جۇما كۇنى جاكارتادان جاۋىن بۇلتتارىن شىعارۋعا كىرىستى. بيلىك ساۋىردە اياقتالاتىن جاۋىن-شاشىن ماۋسىمىندا بۇدان دا ۇلكەن سۋ تاسقىنى بولۋى مۇمكىن ەكەنىن ەسكەرتەدى.
سۋ تاسقىنى يندونەزيانىڭ ينفراقۇرىلىم ماسەلەسىن الدىڭعى ورىنعا قويدى.
مەملەكەت استاناسىندا 10 ميلليون ادام ءومىر سۇرەدى، قالا سىرتىنداعى تۇرعىنداردى قوسقاندا 30 ملن ادام. دجاكارتا جەر استى سۋلارىن دۇرىس پايدالانباعاندىقتان الەمنىڭ ەڭ جىلدام باتاتانى قالالارىنىڭ ءبىرى سانالادى، استانادا جەر سىلكىنىسى مەن سۋ تاسقىنى ءجيى بولىپ تۇرادى. باعالاۋ بويىنشا حالىق تىعىزدىعى ەل ەكونوميكاسىنا جىلىنا 6,5 ميلليارد دوللار شىعىن كەلتىرەدى.
پرەزيدەنت دجوكو ۆيدودو تامىز ايىندا ەل استاناسى حالىق سيرەك قونىستانعان، تروپيكالىق ورماندارى جانە ورانگۋتاندارىمەن تانىمال بورنەو ارالىنداعى شىعىس كاليمانتان پروۆينتسياسىنا اۋىساتىنىن مالىمدەدى.