بۇل تۋرالى ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى، دەپ حابارلايدى قازاقپارات ءتلشىسى.
«ورمان قورىنا جاتاتىن جەرلەردىڭ جالپى كولەمى 30 ميلليون گەكتاردى قۇرايدى جانە رەسپۋبليكامىزدىڭ %11 ءىن الىپ جاتىر. 13 ميلليون گەكتار جەردە ورمان ءوسىپ جاتىر، ورمان كولەمىنىڭ كورسەتكىشى %4,8 دى قۇرايدى. ورماندى القاپتار قىزىلوردا، جامبىل وبلىستارىن الىپ جاتىر. ول جەرلەردە نەگىزىنەن سەكسەۋىلدەر وسەدى. بالقاراعاي، مايقاراعاي، سامىرسىن جانە شىرشا سياقتى اسا قۇندى اعاش تۇرلەرىنىڭ قورلارى شقو مەن الماتى وبلىسىندا شوعىرلانعانىن ايتا كەتۋ قاجەت. مەملەكەت باسشىسى قىركۇيەك ايىندا ءوزىنىڭ جولداۋىندا ەلدى اۋقىمدى كوگالداندىرۋ ماقساتىندا 5 جىل ىشىندە 2 ميلليارد تال ەگۋدى تاپسىرعانى بەلگىلى. وسىعان بايلانىستى مينيسترلىك وبلىس اكىمدىكتەرىمەن بىرلەسىپ، وڭىرلەر بويىنشا تال ەگۋ كولەمى انىقتالدى»، - دەيدى ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
ونىڭ ايتۋىنشا، اكىمدىكتەردىڭ تابيعات جانە ورمان قورعاۋ مەكەمەلەرىنىڭ وكىلدەرى 464 مىڭ گەكتار اۋماقتا 1,1 ميلليارد تال ەكتى.
«بارىنشا كوپ تال ەگۋ تۇركىستان، قىزىلوردا جانە جامبىل وبلىستارىندا جوسپارلانىپ وتىر. بۇل جەردە اتالعان مولشەردىڭ نەگىزگى ۇلەسى سەكسەۋىل بولادى. ارال تەڭىزىنىڭ قۇرعاپ قالعان بولىگىندە دە وسى جۇمىستار اتقارىلادى. رەسپۋبليكانىڭ ورتالىق وڭىرلەرىندە قاراعاي، شىرشا، قايىڭ سياقتى نەگىزگى ورمان قۇراۋشى تۇقىمدارعا جاتاتىن تالدار ەگىلەدى. بۇدان باسقا، ۇلتتىق پاركتەر مەن رەزەرۆاتتار اۋماعىندا 62,5 مىڭ گەكتار القاپتا شامامەن 250 ميلليون كوشەت وتىرعىزىلادى. ال كومپەنساتسيا رەتىندە وتىرعىزىلاتىن اعاشتار اۆتوموبيل جانە تەمىرجولدار بويىنداعى قورعانىس جولاقتارى، سونداي-اق حالىقارالىق گرانتتار ەسەبىنەن 180-2000 گەكتار القاپقا 700 ميلليون اعاش وسىرىلەدى. قازىرگى ۋاقىتتا رەسپۋبليكا بويىنشا 155 ورمان باعى جۇمىس ىستەيدى. سونىمەن قاتار، ۋاقىتشا تۇقىمباقتار قۇرۋ ماسەلەسى تۋىنداۋى مۇمكىن. ورمان مەكەمەلەرىنىڭ ماتەريالدىق- تەحنيكالىق جابدىقتالۋىن نىعايتۋ قاجەت ەكەنىن ايتقىم كەلەدى»، - دەيدى ول.