بۇل تۋرالى بۇگىن ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى.
«ولاردىڭ جالپى سانى باسىندا 45 ادام بولعانى انىقتالدى. ءبىراق ولار «جيھاد» جاريالاپ، پاتەردەن شىققان كەزدە، 19 ادام باس تارتقان، ءبىز ولاردى انىقتادىق، قازىر ولاردان جاۋاپ الىنۋدا»، - دەدى مينيستر بۇگىن حالىق الدىندا بەرگەن ەسەبىندە.
ق. قاسىموۆتىڭ اتاپ كورسەتكەنىندەي، اقتوبەدەگى لاڭكەستەردىڭ باستى ماقساتى - قارۋعا قول جەتكىزىپ، كەيىن اتالعان وڭىردە ءبىرقاتار تەراكت جاساۋ بولعان.
«كەلىسكەن 29 ادام، دۇكەنگە كەلگەن («پاللادا» قارۋ دۇكەنى)، جولاي تاعى ءۇش ادام باس تارتقان، دۇكەنگە كىرگەندە تاعى ءبىر ادام رايىنان تايىپ، توپتان ءبولىنىپ كەتكەن. قالعان 25 ادام وسى لاڭكەستىكتى جاساپ وتىر. ول بەينەكامەرادا دا كورىنىپ تۇر»، - دەيدى مينيستر.
ەسكە سالا كەتەيىك، 5 - ماۋسىمدا اقتوبەدە تەراكت ورىن الدى. 25 ادام قارۋ دۇكەنىنە، كەيىن اسكەري بولىمشەگە شابۋىل جاسادى. سالدارىنان ۇلتتىق ۇلاننىڭ 3 اسكەري قىزمەتشىسى مەن 5 بەيبىت تۇرعىن قازا تاپتى. 7 اسكەري قىزمەتشى مەن 12 پوليسەي جاراقات الدى. قازىرگى ۋاقىتتا تەراكتىگە قاتىسقانداردىڭ بارلىعى ۇستالدى جانە كەيبىرىنىڭ كوزدەرى جويىلدى. تەرگەۋ جۇرگىزىلۋدە.
ەلدە 40 كۇنگە لاڭكەستىك قاۋىپىنىڭ «سارى» دەڭگەيى بەلگىلەندى.
اۆتور: جاسۇلان جولدىبايەۆ