قازاقستاندا نەمىس كاپيتالىمەن 450 كاسىپورىن جۇمىس ىستەيدى
«كەزدەسۋ بارىسىندا تاراپتار ساياسي جانە ساۋدا-ەكونوميكالىق سالاداعى قازاقستان-گەرمان ىنتىماقتاستىعىنىڭ قازىرگى جاعدايى مەن كەلەشەگىن تالقىلادى. سونداي-اق، ەكىجاقتى قارىم-قاتىناستى ودان ءارى كەڭەيتۋ مەن نىعايتۋعا باعىتتالعان مىندەتتەمە راستالدى»، - دەلىنگەن مينيسترلىكتىڭ حابارلاماسىندا.
سونىمەن قاتار، 2017-جىلدىڭ شىلدەسىندە استانادا وتكەن ق ر پرەزيدەنتى نۇرسۇلتان نازاربايەۆ پەن گ ف ر پرەزيدەنتى فرانك-ۆالتەر شتاينمايەر اراسىندا جاسالعان كەلىسسوزدىڭ ناتيجەسىندە قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى تالقىلاندى.
«گەرمانيا قازاقستاننىڭ ەۋروپالىق وداقتاعى ماڭىزدى جانە ستراتەگيالىق ارىپتەسى. ءبىز ەكىجاقتى ىنتىماقتاستىق اياسىن كەڭەيتۋگە، اتاپ ايتقاندا قازاقستان نارىعىنا نەمىس ينۆەستيتسيالارىن جانە تەحنولوگيالارىن تارتۋعا مۇددەلىمىز. سىرتقى ىستەر مينيسترلىگىنە جۇكتەلگەن جاڭا مىندەتتەر اياسىندا ءبىزدىڭ ىنتىماقتاستىعىمىز جاڭا سەرپىن الادى»، - دەدى مينيستر بەيبىت اتامقۇلوۆ.
حابارلامادا ايتىلعانداي، نەمىس ەلشىسى قازاقستانمەن قارىم-قاتىناستى دامىتۋ گەرمانيا ديپلوماتياسىنىڭ ورتالىق ازيا ايماعىنداعى باسىمدىقتارىنىڭ ءبىرى ەكەندىگىن اتاپ ءوتتى. جانە دە تيلو كليننەر قازاقستان ەكونوميكاسىن ودان ءارى جاڭعىرتۋ جوسپارلارىن قۇپتاپ، بىرلەسكەن جوبالاردى جۇزەگە اسىرۋدا جاردەمدەسۋگە دايىن ەكەنىن ءبىلدىردى.
مينيسترلىك دەرەگىنە سۇيەنسەك، 2005-جىل مەن 2018-جىلدىڭ قاراشا ايى ارالىعىندا گەرمانيادان قازاقستانعا 8,6 ميلليارد ا ق ش دوللارىن قۇرايتىن ينۆەستيتسيا تارتىلدى. ودان بولەك، وتكەن جىلدىڭ قاڭتار-قاراشا ايىنداعى ەكىجاقتى تاۋار اينالىمى 1,9 ميلليارد ا ق ش دوللارىن قۇرايدى. سونداي-اق، بۇگىنگى كۇنى قازاقستاندا نەمىس كاپيتالىمەن 450 كاسىپورىن جۇمىس ىستەيدى.