قازاقستان رەسەيدەن 45 مىڭ توننا اي-95 بەنزينىن يمپورتتايدى

استانا. قازاقپارات - قازاقستان رەسەيدەن 45 مىڭ توننا اي-95 بەنزينىن يمپورتتايدى.

بۇل تۋرالى ەنەرگەتيكا ۆيتسە-ءمينيسترى ەرلان اقكەنجەنوۆ ايتتى، دەپ حابارلايدى قازاقپارات ءتىلشىسى.

«بيىل ەكى مينيسترلىك اراسىندا قول قويىلعان ينديكاتيۆتى تەڭگەرىمگە بايلانىستى 45 مىڭ توننا اي-95 ماركالى بەنزين يمپورتتاۋ كوزدەلگەن. قازىرگى ساتتە «قازمۇنايگاز» ۇلتتىق كومپانياسىنىڭ ەنشىلەس ۇيىمدارىمەن ءتيىستى كەلىسىمشارت جاسالعان جانە ويمپورت وسى تامىز ايىنان جۇزەگە اسىرىلا باستايدى. ءبىرىنشى يمپورت شامامەن 19 مىڭ توننا بولماق. ءبىراق، بۇل نەبارى ەكى ايعا سوزىلاتىن ءبىر رەتتىك اكسيا. جالپى، قازاندا شىمكەنت مۇناي وڭدەۋ زاۋىتىندا اي-95 بەنزينىن شىعارا باستايمىز»، - دەدى ول ەكىباستۇز قالاسىنىڭ جۇرتشىلىعىمەن كەزدەسۋ بارىسىندا جۋرناليستەردىڭ سۇراقتارىنا وراي.

ونىڭ ناقتىلاۋىنشا، رەسەيدەن يمپورت بەنزين تامىز ايىنىڭ سوڭىندا جەتكىزىلەدى.

«بۇل قازاقستان مەن رەسەي فەدەراتسياسى اراسىنداعى شەكارادا ەكى باعىتتا دا تۋىندايتىن كولىك كەپتەلىسىنە بايلانىستى. ويتكەنى، جولعا تەك مۇناي ونىمدەرىمەن عانا ەمەس، سونىمەن بىرگە وزگە دە تاۋارلارعا بايلانىستى ۇلكەن جۇكتەمە ءتۇسىپ وتىر»، - دەدى ەرلان اقكەنجەنوۆ.