قازاق مەملەكەتتىك سيركىنىڭ 45 جىلدىق مەرەيتويى قازاق حاندىعىنىڭ 550 جىلدىعىنا ارنالادى
قازاق مەملەكەتتىك سيركىنىڭ اشىلعانىنا 24- شىلدەدە 45 جىل تولادى. وسى مەرەكەگە وراي ەكى بولىمنەن تۇراتىن مەرەيتويلىق باعدارلاما ازىرلەنگەن.
العاشقى، حالىقارالىق بولىمدە الەمدىك سيرك ارتىستەرى ونەر كورسەتسە، ەكىنشى ءبولىم قازاق حاندىعىنىڭ 550 جىلدىعىنا ارنالادى.
«قازاق حاندىعىنىڭ 550 جىلدىعىنا وراي ءبىز تەاترلاندىرىلعان سيركتىك قويىلىم قويامىز. قازىر تاريحي تاقىرىپقا بايلانىستى سەناري جازىپ جاتىرمىز. وندا جانرلاردىڭ سينتەزى: حورەوگرافيا، تەاتر، بالەت، اكروباتيكا ەلەمەنتتەرى بولادى. قويىلىم كونە اڭىز جەلىسىنە نەگىزدەلەدى. سپەكتاكلگە ارناپ ۇلتتىق كوستيۋمدەر تىگىلىپ، ۇلتتىق مۋزىكا جازىلادى. مۋزىكانى جاندى ورىنداۋ ءۇشىن قازاق ۇلتتىق ونەر اكادەمياسىنان ۆوكاليستەردى ىرىكتەۋدى ويلاپ وتىرمىز. ءبىراق بۇل ماسەلە ءالى شەشىلگەن جوق»، - دەدى د. دوسباتىروۆ.
سونداي-اق، سيرك ديرەكتورى العاشقى بولىمدە يسپانيادا وتكەن حالىقارالىق سيرك فەستيۆالىنەن «كۇمىس ءپىل» جۇلدەسىن جەڭىپ العان اندرەي مەن ءاليا قاناحيندەر «سەن جانە مەن» ءنومىرىن ورىندايتىنىن جەتكىزدى.
«اتالعان كومپوزيتسيادا ليبرەتتونى ءانشى كارينا ابدۋللينا جاندى داۋىسپەن ورىنداعانىن قالار ەدىك. قازىر ونىمەن كەلىسسوزدەر جۇرگىزىلىپ جاتىر»، - دەدى د. دوسباتىروۆ.
اۆتور: گۇلميرا عوسمانالي