ىشكى ىستەر مينيسترلىگىنىڭ حابارلاۋىنشا، ان-26 ۇشاعىنىڭ تاريحى 1981-جىلدان باستالادى. كيەۆ اۆياتسيالىق زاۋىتىندا شىعارىلعان اۋە كەمەسى العاشقى ون جىل ىشىندە ك س ر و مەملەكەتتىك قاۋىپسىزدىك كوميتەتى شەكارا اسكەرلەرىنىڭ اۆياتسياسى قۇرامىندا قىزمەت اتقارعان.
ۇشاقتىڭ نەگىزگى بازاسى قازاق ك س ر اۋماعىندا ورنالاسىپ، وڭتۇستىك شەكارانى كۇزەتۋگە بايلانىستى مىندەتتەردى ورىنداۋعا، اسكەري قىزمەتشىلەر مەن جۇكتەردى تاسىمالداۋعا پايدالانىلعان.
1992-جىلى ان-26 ۇلتتىق ۇلاننىڭ اۆياتسياسى قۇرامىنا بەرىلدى. سودان بەرى ۇشاق اسكەري قىزمەتشىلەر مەن جۇكتەردى تاسىمالداپ، ءتۇرلى قىزمەتتىك مىندەتتەردى ورىندادى.
- ۇزاق جىلدار بويى پايدالانىلعان اۋە كەمەسى زاماناۋي تالاپتارعا ساي جاڭعىرتىلىپ، يكاو ستاندارتتارىنا سايكەستەندىرىلگەن. بۇل ان-26 ۇشاعىنا قازاقستان اۋماعىنان بولەك، جاقىن شەتەلدەرگە دە ۇشۋعا مۇمكىندىك بەرگەن، - دەلىنگەن حابارلامادا.
ۇلتتىق ۇلان اۆياتسياسىنىڭ قۇرامىندا ان-26 8400 ساعات ۇشقان. ال ۇشاقتىڭ جالپى قىزمەت ءوتىلى 44 جىلعا سوزىلدى.
ۇشاقتىڭ سوڭعى رەيسى ونى ۇزاق جىل باسقارعان ەكيپاج مۇشەلەرى ءۇشىن ەرەكشە مانگە يە بولدى. 3656 اسكەري ءبولىمىنىڭ ۇشقىشى مەدەت سەيتوۆ ان-26 ۇشاعىن 15 جىلدان بەرى باسقارىپ كەلگەن. ول ەكيپاج قۇرامىنداعى وسى تيپتەگى اۋە كەمەسىنىڭ سوڭعى ۇشقىش-نۇسقاۋشىسى.
سوڭعى رەيستەن كەيىن ەكيپاج مۇشەلەرى ۇزاق جىل بويى بىرگە قىزمەت اتقارعان اۋە كەمەسىمەن قيماي قوشتاستى.
وسىلايشا، ان-26-نىڭ پايدالانۋدان شىعارىلۋىمەن قازاقستان اسكەري اۆياتسياسىنداعى بۇل تيپتەگى ۇشاقتاردىڭ 44 جىلدىق تاريحى اياقتالدى. 8400 ساعات اۋەدە بولعان اسكەري-تاسىمال ۇشاعى ەندى جاۋىنگەرلىك قىزمەت اتقارمايدى.