قايعىلى وقيعا سەيسەنبى كۇنى ءتۇن ورتاسىنا قاراي ورىن العان. افينادان سالونيكي قالاسىنا جول تارتقان جولاۋشىلار پويىزى جوعارى جىلدامدىقپەن جۇيتكىپ كەلە جاتىپ، قارسى شىققان جۇك پويىزىمەن بەتپە-بەت سوقتىعىسقان. سونىڭ سالدارىنان جولاۋشىلار پويىزىنىڭ ءۇش ۆاگونى رەلستەن شىعىپ كەتىپ، ارتىنان ءورت تۇتانعان.
جۇك پويىزىنىڭ ءدال سول جولعا نەلىكتەن تۇسكەنى ازىرشە بەلگىسىز. توتەنشە جاعدايدى تەرگەۋ اياسىندا لاريسا قالاسىنىڭ تەمىر جول ستانساسى باستىعىنىڭ تۇتقىنعا الىنعانى، ونىڭ ۇستىنەن بىرنەشە ادامنىڭ ولىمىنە سەبەپ بولعان تاسىمالداۋ قاۋىپسىزدىگىن بۇزۋمەن بايلانىستى اۋىر قىلمىس بويىنشا ءىس قوزعالعانى تۋرالى حابار بار. ءبىراق، ونىڭ اتى-ءجونى جاريالانعان جوق. ەگەر ستانسا باستىعىنىڭ كىناسى دالەلدەنەتىن بولسا، وندا ول گرەكيا قىلمىستىق كودەكسىنىڭ 291- بابىنا سايكەس 10 جىلدان ءومىر بويعا دەيىن باس بوستاندىعىنان ايىرىلۋى مۇمكىن.
اپاتقا كىم كىنالى؟
گرەكيانىڭ ERT1 تەلەارناسىنىڭ قۇقىق قورعاۋ ورگاندارىنداعى دەرەككوزىنە سىلتەمە جاساپ حابارلاۋىنشا، ستانسا باستىعى ءوزىنىڭ كىنالى ەكەندىگىن مويىنداعان.
«مەن قاتەلىك جبەردىم. كاتەرينيدەن كوممەرتسيالىق جۇك پويىزى كەلە جاتقان باعدارعا جولاۋشىلار پويىزىن جونەلتتىم»، - دەپ مويىنداعان ستانسا باستىعى.
Associated Press اگەنتتىگىنىڭ دەرەكتەرىنە قاراعاندا، جول اپاتىنان كەمىندە 43 ادام قازا تاپقان. قازا تاپقانداردىڭ اراسىندا كىشكەنتاي بالالار مەن ستۋدەنتتەردىڭ سانى باسىم. سونىمەن قاتار 9 تەمىرجولشى مەرت بولعان. گرەكيا قارجى مينيسترلىگى قازا تاپقانداردى جەرلەۋ ءراسىمىن مەملەكەت قاراجاتى ەسەبىنەن جۇزەگە اسىرۋ تۋرالى شەشىم شىعاردى.
لاريسا قالاسىنىڭ باس كورونەرى رۋبيني لەونداري ولگەن ادامداردىڭ كىم ەكەنىن انىقتاۋ ءۇشىن د ن ك- ساراپتاما قاجەت ەكەنىن ايتىپ وتىر. ويتكەنى، مايىتتەر ادام تانىماستاي بۇلىنگەن. ءورت سوندىرۋشىلەر دە جالىن تەمپەراتۋراسى 1300 گرادۋسقا جەتكەنىن ايتۋدا.
Hellenic Train تەمىر جول كومپانياسىنىڭ مالىمەتتەرىنە سايكەس، ەكى پويىزدا جالپى 354 ادام بولعان. ونىڭ ىشىندە جولاۋشىلار پويىزىندا 12 بريگادا مۇشەسى مەن 342 جولاۋشى، ال جۇك پويىزىندا 2 ادامنىڭ بولعانى انىقتالىپ وتىر. گرەك ءورت ءسوندىرۋ قىزمەتىنىڭ اقپاراتىنا قاراعاندا، پويىزدار سوقتىعىسقاننان كەيىن 72 ادام اۋرۋحاناعا تۇسكەن. ولاردىڭ 15 ءى سارسەنبى كۇنى كەشكىسىن ۇيلەرىنە جىبەرىلدى.
وسى قايعىلى وقيعادان كەيىن ەلدىڭ كولىك ءمينيسترى كوستاس كارامانليس رەسمي مالىمدەمە جاساپ، قىزمەتىنەن كەتەتىندىگىن اشىق ايتتى.
«قازىر عانا تەمپە قالاسىنان، قايعىلى وقيعا ورىن العان جەردەن ورالدىم. جۇرەك اۋىرادى. گرەك تەمىر جولىن 21- عاسىرعا ساي كەلمەيتىن جاعدايدا العانىمىز فاكتى. وسى 3,5 جىلدىڭ ىشىندە مۇنداي جاعدايدى جاقسارتۋ ءۇشىن بارلىق كۇش-جىگەرىمىزدى جۇمسادىق. وكىنىشكە قاراي، بۇل كۇش-جىگەرىمىز مۇنداي اپاتتىڭ الدىن الۋعا جەتكىلىكسىز بولىپ شىقتى. جانە دە بۇل بارلىعىمىز ءۇشىن دە، جەكە ءوزىم ءۇشىن دە وتە اۋىر جايت. وسىنداي قاعىلى وقيعالار ورىن العاننان كەيىن تۇك بولماعانداي ارى قاراي جۇمىس ىستەي بەرۋ مۇمكىن ەمەس»، - دەپ جازدى ول Facebook پاراقشاسىندا.
سونىمەن قاتار كولىك ءمينيسترى ساياساتتا بىرنەشە جىلدان بەرى جۇرگەنىن، ءبىراق، ەل ازاماتتارىنىڭ ساياسي جۇيەگە سەنىم ارتۋى دەموكراتيانىڭ ماڭىزدى ەلەمەنتى سانايتىنىن اتاپ وتەدى.
«مۇنى ساياسي جاۋاپكەرشىلىك دەپ اتايدى. وسى سەبەپتى مەن ينفراقۇرىلىم جانە كولىك ءمينيسترى لاۋازىمىنان وتستاۆكاعا كەتەتىندىگىمدى جاريالايمىن. ومىردەن ادىلەتسىز وتكەن ادامدارعا تىم بولماعاندا قۇرمەت رەتىندە ارەكەت ەتۋدى جانە گرەك مەملەكەتى مەن ساياسي جۇيەنىڭ دەر ۋاقىتىندا تۇزەمەگەن قاتەلىگىنە جاۋاپكەرشىلىكتى ءوز موينىما الۋدى پارىزىم دەپ سانايمىن»، - دەدى كوستاس كارامانليس.
پويىزدار نەگە سوقتىعىستى؟ بولجام
ERT1 تەلەارناسىنىڭ مالىمەتىنشە، گرەكيا تەمىر جولدارى ۇيىمى ماشينيستەر فەدەراتسياسىنىڭ (OSE) پرەزيدەنتى كوستاس گەنيدۋنياس پويىزداردىڭ سوقتىعىسۋىنا قاتىستى ءوزىنىڭ بولجامىن بىلدىرگەن. ونىڭ اتاپ وتۋىنشە، تەمىر جولداعى اپات اۆتوماتتاندىرىلعان ەسكەرتۋ جۇيەسىنىڭ ىستەن شىعۋى سالدارىنان ەكى پويىز ءبىر جولعا ءتۇسۋى ىقتيمال.
«ەشتەڭە جۇمىس ىستەمەيدى. مۇنىڭ بارلىعى ادامي فاكتوردى قولدانۋ ارقىلى، ياعني قولمەن جاسالىپ وتىر»، - دەدى ماشينيستەر فەدەراتسياسىنىڭ پرەزيدەنتى.
كوستاس گەنيدۋنياستىڭ سوزىنە قاراعاندا، ەگەر جۇيە جۇمىس ىستەپ تۇرعان كەزدە ماشينيستەر قىزىل دابىل بەلگىسىن بايقاپ، پويىز 500 مەترلىك اراقاشىقتىقتا توقتار ەدى.
«كەيبىر ۆاگوندارداعى جولاۋشىلار شىعا الماي قالدى»
Reuters اگەنتتىگى پويىزدار سوقتىعىسقاننان كەيىن ۆاگوندار اۋدارىلىپ، ءورت قۇشاعىنا ورانعان ءساتتى باستان كەشىرگەن جولاۋشىلاردىڭ «10 سەكۋند ىشىندەگى» جانتۇرشىگەرلىك وقيعالارىن جاريالادى.
قيراعان ۆاگوننان سەكىرىپ امان قالعان 28 جاستاعى ستەرگيوس مينەنيس قاتتى جارىلىستى ەستىگەندەرىن ايتادى.
«ءبىز ۆاگونمەن بىرگە ول بۇيىرلەپ قۇلاعانعا دەيىن اۋنادىق. سودان كەيىن دۇربەلەڭ باستالىپ كەتتى. ۆاگوندى بىردەن ءورت شارپىدى. اۋناپ كەلە جاتقان كەزدىڭ وزىندە ءورت شىققان بولاتىن. بارلىق جەردە قىزىل جالىن بولدى. 10-15 سەكۋندتىڭ ىشىندە ناعىز الاساپىران ورىن الدى»، - دەپ ەسكە الادى ستەرگيوس مينەنيس.
ال گرەكيانىڭ Skai تەلەارناسىنا سۇحبات بەرگەن ءتىرى قالعان جولاۋشىلاردىڭ ءبىرى وتە قورقىنىشتى بولعانىن ەسكە الادى.
«باقىتىمىزعا وراي ءبىز ەسىكتى وتە جىلدام اشىپ، سىرتقا شىعا الدىق. ال وزگە ۆاگونداعى ادامدار شىعا الماي قالدى»، - دەدى ول.
گرەكيادا ءۇش كۇندىك ۇلتتىق ازا تۇتۋ جاريالاندى
ايتا كەتەرلىگى، قايعىلى وقيعا ورىن العان كەزدە گرەكيا پرەزيدەنتى كاتەرينا ساكەللاروپۋلۋ مولدوۆادا رەسمي ساپارمەن جۇرگەن بولاتىن. قايعىلى وقيعانى ەستىگەننەن كەيىن ول ساپارىن توقتاتۋ تۋرالى شەشىم قابىلدادى.
«ساپارىمدى توقتاتىپ، وتانىما ورالۋعا ءماجبۇرمىن. ويتكەنى، قازىرگى ۋاقىتتا ءبىزدىڭ بارلىق ويىمىز پويىزدا بولعان ادامدارمەن، جاقىندارىنان ايىرىلعانداردىڭ تۋعان-تۋىستارىمەن، جاراقاتتانعاندارمەن بىرگە»، - دەدى ول كيشينيەۆتە وتكەن بريفينگ بارىسىندا.
ال گرەكيا پرەمەر-ءمينيسترىنىڭ شەشىمىمەن 1-3- ناۋرىز كۇندەرى ەلدە ءۇش كۇندىك ۇلتتىق ازا تۇتۋ كۇنى دەپ جاريالاندى.
جاستار ەرەۋىلى
تاسس اگەنتتىگىنىڭ اقپاراتىنا قاراعاندا، وسى قايعىلى وقيعادان كەيىن گرەك جاستارى افينا مەن سالونيكي قالالارىندا نارازىلىق اكسياسىن ۇيىمداستىردى. ناقتىراق ايتساق، افينادا جاستار گرەكياداعى بارلىق جولاۋشىلار مەن جۇك تاسىمالىن جۇزەگە اسىراتىن يتالياندىق Hellenic Train تەمىر جول كومپانياسىنىڭ كەڭسەسىنە جينالدى. جاستاردىڭ ءتۇرلى ۇيىمدارىنىڭ وكىلدەرى مايشام جاعىپ، قارا ترانسپارانتتەر كوتەردى. الايدا، پوليتسيا ارناۋلى جاساعىنىڭ وتريادى كوزدەن جاس اعىزاتىن گاز قولدانىپ، جاستاردى كەڭسە الدىنان ىعىستىردى.
سالونيكي جاستارى دا نارازىلىق شەرۋىن وتكىزدى. ءىس-شاراعا شامامەن 2 مىڭ ادام قاتىسىپ، ولار قالا ورتالىعىمەن ءجۇرىپ ءوتتى. سونىمەن قاتار جاڭادان سالىنعان سالونيكي تەمىر جول ۆوكزالى ماڭىنا بارىپ، پويىز اپاتىنان مەرت بولعانداردىڭ قۇرمەتىنە گۇل شوقتارىن قويدى.