وڭتۇستىك قازاقستان وبلىسىندا 43 سۋ قويماسىنىڭ ءبىرقاتارى لىقا تولىپ تۇر
ءوڭىردىڭ توتەنشە جاعدايلار دەپارتامەنتىنىڭ باستىعى نۇربولات دەربىسوۆ كوكتەمگى مەزگىلدە بولۋى ىقتيمال توتەنشە جاعدايلاردىڭ الدىن الۋ بويىنشا ءتيىستى جۇمىستار اتقارىلىپ جاتقانىن ايتادى، دەپ حابارلايدى قازاقپارات ح ا ا ءتىلشىسى.
ونىڭ سوزىنشە، بۇگىنگى تاڭدا وبلىس كولەمىندەگى 43 سۋ قويماسىنىڭ ءبىرقاتارى تولۋىنا بايلانىستى ترانزيتتىك رەجىمگە كوشىرىلگەن. ياعني، بۇل دەگەنىمىز سۋ قويمالارىنىڭ نوسەرلەپ جاۋعان جاۋىن- شاشىن مەن تاۋداعى قاردىڭ ەرىندى سۋلارىن قاۋىپسىز قابىلداپ وتكىزۋ مۇمكىندىگىن تومەندەتكەن. سۋ تاسقىنىنىڭ الدىن الۋ جانە ونىڭ سالدارىن جويۋ ءۇشىن بۇل باعىتتاعى جۇمىستار باستالىپ جۇيەلى جۇرگىزىلىپ جاتقانىن جەتكىزگەن نۇربولات بەكبولات ۇلى سۋ قويمالاردا قاۋىپسىز رەجىمدى ساقتاۋ بارىنشا كۇشەيتىلگەنىن العا تارتادى. ماسەلەن، جامبىل وبلىسىندا جاۋعان قاتتى جاۋىن- شاشىن مەن تاۋداعى قاردىڭ ەرۋى سالدارىنان بورالداي وزەنىنىڭ سۋى 375 س م- گە كوتەرىلىپ، بورالداي ەلدى مەكەنىنىڭ تۇسىندا اعىسى سەكۋندىنا 250 تەكشە مەتردى قۇراعان.
«جەرگىلىكتى اكىمدىك پەن پوليتسيا، ءورت ءسوندىرۋ بولىمدەرىنىڭ قىزمەتكەرلەرى تۇرعىندارمەن بىرىگىپ قورعانىس دامبالارىنىڭ وسال جەرلەرىن كوتەرىپ، نىعايتىپ، تاۋلىك بويى قاۋىپتى جەرلەرگە كەزەكشىلىك ۇيىمداستىرۋ سياقتى اتقارىلعان جۇمىستار ارقاسىندا ءبىز ۇلكەن تاسقىن سۋدى وتكىزىپ، تۇلكىباس اۋدانىنداعى بىرنەشە ەلدى مەكەندەردى سۋ باسۋدان قورعادىق»، - دەدى ن. دەربىسوۆ.
بورالداي وزەنىنىڭ تاسقىن سۋى ارىس وزەنىنە قوسىلىپ، سۋدىڭ اعىسى سەكۋندىنا 243 تەكشە مەتر جىلدامدىقپەن وتكەن. سالدارىنان ورداباسى، ارىس، وتىرار اۋداندارىندا سۋدىڭ دەڭگەيى كوتەرىلگەن. ءبىراق ناقتى شارالاردى ۋاقتىلى قولعا الىپ، بوگەتتەر جاساۋدىڭ ارقاسىندا سۋ تاسۋ قاۋپى سەيىلگەن. قازىردىڭ وزىندە وبلىس اۋماعىنداعى وزەن ارنالارىندا قاجەتتى شارالار اتقارۋ، بارلىق وزەن سۋلارى مەن سۋ قويمالارى قاتاڭ باقىلاۋعا الىپ، مونيتورينگ جاساۋ جۇمىستارى جۇرگىزىلۋدە. وڭىردە سۋ باسۋى قاۋپى بار جەرلەردە قاشىرتقى كانالدار مەن ارىقتاردى قوقىستاردان تازالاپ، سۋ وتكىزۋ قابىلەتىن جوعارىلاتۋ جانە سۋ قويمالارىندا قاۋىپسىز رەجيمدى ساقتاۋ جۇمىستارى قولعا الىنىپ وتىر. بۇل رەتتە وبلىس اكىمىنىڭ ورىنباسارى ۇلاسبەك سادىبەكوۆ جاۋاپتى مەكەمە باسشىلارىنا، سونداي- اق اۋدان اكىمدەرىنە كوكتەمگى سۋ تاسقىنىنا بايلانىستى جاعدايدى كۇنبە- كۇن باقىلاپ، مونيتورينگ جاساپ، بارلىق قاجەتتى شارالاردى قولعا الۋدى تاپسىرعان بولاتىن. قازىر كۇنگەيدە كۇن ەداۋىر جىلىنىپ، اۋا تەمپەراتۋراسى 20 گرادۋستان جوعارى بولىپ تۇر.
اۆتور: اينۇر اقبايەۆا