ەلوردادا جىل باسىنان بەرى ماس كۇيىندە 430 جۇرگىزۋشى ۇستالدى
اعىمداعى جىلدىڭ باسىنان بەرى كولىك قۇرالىن ماس كۇيىندە جۇرگىزگەن 430 جۇرگىزۋشى ۇستالدى. 2020 -جىلدىڭ قاڭتارىنان باستاپ جازالاۋ شاراسى قاتاڭداتىلعانىنا قاراماستان، وتكەن جىلدىڭ ۇقساس كەزەڭىمەن سالىستىرعاندا بۇزۋشىلىقتاردىڭ ءوسۋى بايقالادى. وتكەن جىلى وسىنداي كەزەڭدە 418 ماس جۇرگىزۋشى ۇستالدى.
2022 -جىلى جۇرگىزۋشىلەردىڭ قاتىسۋىمەن ماس كۇيىندە 62 جول-كولىك وقيعاسى ورىن الدى (2021 - 79). ۇستالعان ادامدار اكىمشىلىك سوتتىڭ شەشىمىمەن ون بەس تاۋلىكتەن جيىرما تاۋلىككە دەيىن اكىمشىلىك قاماۋعا نەمەسە جەتى جىل مەرزىمگە كولىك قۇرالىن جۇرگىزۋ قۇقىعىنان ايىرۋ تۇرىندە اكىمشىلىك جاۋاپكەرشىلىككە تارتىلدى.
سونىمەن قاتار، 16 جۇرگىزۋشى جاقىن شەتەل ازاماتتارى بولىپ تابىلادى، ولار قازاقستان رەسپۋبليكاسى زاڭىنىڭ نورمالارىنا سايكەس اكىمشىلىك جاۋاپكەرشىلىككە تارتىلعان جانە قازىرگى ۋاقىتتا ق ر شەگىنەن شىعارۋ ماسەلەسى شەشىلۋدە.