تۇركىستاندا ناۋرىز كەزىندە 42 مادەني ءىس- شارا وتەدى
ءوڭىر باسشىسى الدىمەن حالىقارالىق دەڭگەيدە تويلانعالى وتىرعان ناۋرىز مەرەكەسى وتەتىن الاڭدا بولىپ، قوناقتارعا قازاقتىڭ سالت- ءداستۇرىن پاش ەتەتىن ەتنواۋىل مەن قولونەر قالاشىعىن ارالاپ كوردى. ونداعى ماقسات - حالىقارالىق دەڭگەيدەگى مادەني شارانىڭ اشىلۋ سالتاناتى مەن تۇركى الەمىنە ورتاق ناۋرىز مەرەكەسىن جوعارى دەڭگەيدە اتاپ ءوتۋ.
مۇنان سوڭ وبلىس اكىمى حالىقارالىق مادەني شاراعا جاۋاپتى جۇمىسشى توبىنىڭ ەسەبىن تىڭدادى. توپ جەتەكشىسى، وبلىس اكىمىنىڭ ورىنباسارى ۇلاسبەك سادىبەكوۆ «تۇركىستان - تۇركى الەمىنىڭ مادەني استاناسى» اياسىندا اتقارىلاتىن جۇمىستاردىڭ جاي- جاپسارىن باياندادى.
«بۇگىنگى كۇنگە كەلەتىن قوناقتاردىڭ جالپى سانى جوبامەن 800 ادامدى قۇراپ وتىر. جالپى ءىس- شاراعا 4-5 مىڭ حالىق قاتىسادى دەپ جوسپارلانۋدا. شارا اياسىندا ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتىندە 22 - ناۋرىز كۇنى رەسمي قوناقتاردىڭ قاتىسۋىمەن «تۇركىستان جانە تۇركولوگيا» اتتى حالىقارالىق عىلىمي- تەوريالىق كونفەرەنسيا وتكىزۋ جوسپارلانۋدا. كونفەرەنسيا قورىتىندىسى بويىنشا ارنايى ەڭبەك جيناعى شىعارىلاتىن بولادى»، - دەدى ۇلاسبەك سادىبەك ۇلى.
وڭتۇستىك جۇرتىن اۋقىمدى ءىس- شاراعا اتسالىسۋعا شاقىرعان ءوڭىر باسشىسى اتقارىلۋعا ءتيىس ءبىرقاتار ماسەلەلەرگە نازار اۋدارۋ قاجەتتىگىن ەسكەرتتى. سونداي- اق، ول قالا كوشەلەرى مەن ءىس- شارا وتەتىن اۋماقتى بەزەندىرۋ، قوناقتاردى وبلىستاعى تاريحي- مادەني ورىندارمەن تانىستىرۋ، ءتىل بىلەتىن ماماندارمەن قامتاماسىز ەتۋدى جۇكتەدى.
«ەلىمىزدە الدىمەن استانا قالاسىنىڭ، ەندى ەر تۇرىكتىڭ بەسىگى بولعان تۇركىستاننىڭ وسىنداي ماراپاتقا يە بولۋى ەلىمىز ءۇشىن ونىڭ ىشىندە وڭتۇستىك ءوڭىرى ءۇشىن زور ماقتانىش. سوندىقتاندا جالپى جوسپارلانعان جۇمىستاردى جوعارى دەڭگەيدە وتكىزۋ بارشامىزدىڭ ورتاق مىندەتىمىز. جاۋاپتى ساتتە جۇمىلا جۇمىس ىستەپ، قازاق حالقىنىڭ قوناقجاي پەيىلىن تۇركى جۇرتىنا پاش ەتۋگە ءتيىستىمىز»، - دەدى جانسەيىت قانسەيىت ۇلى.
ۇلتتىق كادەسىيلاردىڭ ەرەكشە ۇلگىلەرىن ازىرلەپ جاتقان جەرگىلىكتى شەبەرلەر جۇمىسىنا وڭ باعا بەرگەن وبلىس اكىمى ءماجىلىستى قورىتىندىلاي كەلە جۇكتەلگەن مىندەتتەر مەن تاپسىرمالاردى ءتيىستى قالا، اۋدان اكىمدەرى مەن باسقارما باسشىلارىنا سونىمەن قاتار سالالىق ءتۇرلى جەتەكشىلەرگە ءوز مەرزىمىندە ءارى ساپالى ورىندالۋىن تاپسىردى.
جالپى «تۇركىستان - تۇركى الەمىنىڭ مادەني استاناسى» باعدارلاماسى اياسىندا 42 مادەني ءىس- شارا وتەدى دەپ جوسپارلانۋدا. ونىڭ 14- «تۇركسوي» حالىقارالىق ۇيىمى تاراپىنان وتكىزىلسە، التاۋىن ەلىمىزدىڭ مادەنيەت جانە سپورت مينيسترلىگى، 21- ءىن وڭتۇستىك قازاقستان وبلىسى اكىمدىگى ۇيىمداستىرادى.
ايتا كەتەيىك، بۇدان بولەك، تۇركىستان قالاسىندا ءتۇبى تۇركى تىلدەس حالىقتار تەاترى، وپەرا، سيرك، بي، ساتيرا، ءداستۇرلى ونەر جانە انيماتسيالىق فيلمدەردىڭ فەستيۆالى وتكىزىلەدى. سونىمەن قاتار اقىندار ايتىسى، تۇركى مەملەكەتتەرى ايەلدەرىنىڭ فورۋمى، تۇركى الەمى جۋرناليستەرىنىڭ فورۋمى سۋرەتشىلەردىڭ كەزدەسۋى، قولونەر شەبەرلەرىنىڭ فەستيۆالى، ادەبي جۋرنالدار رەداكتورلارىنىڭ كونگرەسى، اقىن، جازۋشىلارمەن كەزدەسۋلەر وتكىزۋ جوسپارلانىپ وتىر.