سەناتور التىنبەك نۇح ۇلى پالاتا وتىرىسىندا 4,6 ميلليون ادام پاندەميا كەزىندە جۇمىسىنان ايرىلعانى ءۇشىن مەملەكەتتىك الەۋمەتتىك ساقتاندىرۋ قورىنان (م ءا س ق) 476 ميلليارد تەڭگە كولەمىندە قارجىلىق كومەك العانىن ايتتى.
«دەنساۋلىق ساقتاۋ مينيسترلىگىنىڭ سوڭعى مالىمەتتەرى بويىنشا، ەلدە كۇندەلىكتى ۆيرۋس جۇقتىراتىنداردىڭ سانى كۇرت ارتىپ، ورتاشا ەسەپپەن 600 ادام بولدى. بۇل - الاڭداتارلىق جاعداي. 2021 -جىلى ەلدەگى كوروناۆيرۋسقا قاتىستى جاعداي تۇراقتالماسا، جۇمىسىن ۋاقىتشا توقتاتقان جانە تابىسىن جوعالتقان ادامداردى قولداۋعا قانداي شارالار بولادى؟ وسى ماقساتتارعا قاراستىرىلاتىن زاڭ جوباسىندا (2021-2023 -جىلدارعا ارنالعان بيۋدجەت - اۆتور) 42500 تەڭگە مولشەرىندەگى ءبىرجولعى الەۋمەتتىك جاردەماقىنى ەسكەرە وتىرىپ، قاراجات كوزدەلمەگەن. م ءا س ق مۇمكىندىكتەرى قانداي؟»، - دەپ سۇرادى سەنات دەپۋتاتى مينيستردەن.
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ زاڭ بويىنشا ءماسق- دان بەس الەۋمەتتىك تولەم قاراستىرىلعانىن ايتتى.
«پاندەميا كەزىندە ول (مەملەكەتتىك الەۋمەتتىك ساقتاندىرۋ قورى - اۆتور) الەۋمەتتىك ماسەلەلەردى شەشۋگە قاتىستى. اۋىرعاندار ءۇشىن 476 ميلليارد تەڭگە قاراستىرىلدى. ۆيرۋس جۇقتىرعان مەديتسينا قىزمەتكەرلەرىنە تاعى 20,5 ميلليارد تەڭگە تولەندى.
بۇل شىعىندار قورعا تۇسەتىن اقشادان ءۇش ەسە كوپ بولدى. (...) پاندەمياعا بايلانىستى ەل پرەزيدەنتى جاعدايدى ءبىرقالىپتى ساقتاۋ ءۇشىن قاتاڭ شارالار قابىلداۋدى تاپسىردى. ءقازىر ۇلتتىق بانك پەن قارجىلىق باقىلاۋ اگەنتتىگىمەن بىرگە سالداردىڭ الدىن الۋ بويىنشا بىرلەسكەن ءىس- شارالار جوسپارى بار»، - دەدى مينيستر.
الايدا نۇرىمبەتوۆ قازاقستاندىقتار 2021 -جىلى پاندەمياعا بايلانىستى تابىسىنان ايىرىلسا، ولارعا اقشا تولەنەتىن- تولەنبەيتىنىن ناقتىلاعان جوق.
Tengrinews.kz