ر ف تەرگەۋ كوميتەتى ءتوراعاسىنىڭ ورىنباسارى يگور كراسنوۆ «كوممەرسانت» گازەتىنە بەرگەن سۇحباتىندا جەردەگى قىزمەتكە ءارى قاراي تەرگەۋ جۇرگىزىلمەيتىنىن حابارلادى.
«بىزدە بۇل قايعىلى جاعدايدىڭ ناقتى سەبەبى كورسەتىلگەن ساراپشىلار قورىتىندىسى بار. ءبىز اۋە كومپانياسى مەن ۇشقىشتىڭ دالەلىن تەكسەردىك. بۇل اپاتقا ۇشاق كىنالى ەمەس، سەبەبى تەك SSJ- مەن عانا ەمەس، Boeing جانە Airbus-پەن جانە باسقا دا ۇشاقتارمەن بۇلاي قونۋعا بولمايدى»، - دەدى ول.
كراسنوۆ ەۆدوكيموۆكە اۋە كولىگىن پايدالانۋ ەرەجەلەرىن بۇزدى دەگەن ايىپ تاعىلعانىن ەسكەرتتى. قازىر ول ادۆوكاتىمەن بىرگە ءىس ماتەريالدارىمەن تانىسىپ جاتىر. كراسنوۆتىڭ ايتۋىنشا، ەۆدوكيموۆتىڭ ءتۇرلى ۇلگىدەگى ۇشاقتاردى باسقارۋدا ايتارلىقتاي تاجىريبەسى بار جانە ارنايى دايىندىقتان وتكەن.
«سوعان قاراماستان، ءبىزدىڭ قىزمەتكەرلەرىمىز انىقتاعانداي، ول اۋە كەمەسىنىڭ پايدالانۋ شەكتەۋىنەن اسىپ كەتەتىندەي اۋىر جۇك تيەگەن»، - دەدى ت ك ءتوراعاسىنىڭ ورىنباسارى.
ول جىلدامدىقتىڭ جوعارى بولۋىنان جانە ۆەرتيكالدى سالماقتىڭ نورمادان اسىپ كەتۋى سالدارىنان جولاققا تىم قاتتى قونعان. SSJ ۇشۋ-قونۋ جولاعىنان شاسسيدىڭ نەگىزگى تىرەگى سىنعانعا دەيىن ءۇش رەت سەكىرگەن. سونىڭ سالدارىنان ۇشاقتىڭ جانارمايى توگىلىپ، تۇتانعان.
ەۆدوكيموۆتىڭ ادۆوكاتى ناتاليا ميتۋسوۆا ونىڭ ءوز كىناسىن مويىندامايتىنىن ءمالىم ەتتى. وعان ەشقايدا كەتپەۋ تۋرالى ءتىلحات بەرىلگەن.
ەسكە سالا كەتەيىك، وتكەن جىلدىڭ 5 -مامىرىندا شەرەمەتەۆو اۋەجايىنا قونعان ۇشاق ورتەنىپ كەتكەن بولاتىن. بورتتا بولعان 78 ادامنىڭ 41 ى اپاتتا قازا تاپتى.
فوتو: © سەرگەي فادەيچيەۆ/تاسس