بۇگىن 40 گرادۋسقا دەيىن ىستىق: سينوپتيكتەر بولجامى

استانا. قازاقپارات - 1-تامىز كۇنى اتموسفەرالىق فرونتالدى بولىكتەردىڭ وتۋىمەن ەلىمىزدىڭ باسىم بولىگىندە كۇن رايىنىڭ قۇبىلمالى سيپاتى ساقتالىپ، نايزاعاي مەن جاڭبىر بولجانادى.

تەك باتىستا، وڭتۇستىك پەن سولتۇستىك- شىعىستا جاۋىن- شاشىن بولمايدى. بارلىق وڭىردە جەل تۇرادى. سولتۇستىكتە تۇنگى جانە تاڭەرتەڭگى ساعاتتاردا تۇمان كۇتىلەدى، دەپ حابارلايدى قازاقپارات «قازگيدرومەتكە» سىلتەمە جاساپ.

اتاپ ايتقاندا، كۇندىز الماتى، جامبىل، تۇركىستان، قىزىلوردا، اقمولا، اتىراۋ وبلىستارىندا، سونداي-اق جەتىسۋ، ۇلىتاۋ، اباي وبلىستارىندا قوستاناي، اقتوبە، قاراعاندى، شىعىس قازاقستان، ماڭعىستاۋ وبلىستارىنىڭ وڭتۇستىگىندە 35-40 گرادۋس قاتتى ىستىق بولادى.

سولتۇستىك قازاقستان وبلىسىندا، باتىس قازاقستان وبلىسىنىڭ باتىسىندا، سولتۇستىك- باتىسى مەن ورتالىعىندا ءورت تۇتانۋدىڭ جوعارى قاۋپى كۇتىلەدى.

ماڭعىستاۋ، تۇركىستان، الماتى، جامبىل، شىعىس قازاقستان، قاراعاندى، اقتوبە، قىزىلوردا، ۇلىتاۋ، جەتىسۋ، اباي وبلىستارىندا، قوستاناي وبلىسىنىڭ وڭتۇستىگىندە، اتىراۋ وبلىسىنىڭ باتىسىندا، پاۆلودار وبلىسىنىڭ وڭتۇستىگى مەن شىعىسىندا، اقمولا وبلىسىنىڭ وڭتۇستىگى مەن باتىسىندا ءورت تۇتانۋ قاۋپى اسا جوعارى بولادى.