ەلدەگى عالىمداردىڭ 40 پايىزى الماتىدا شوعىرلانعان
«وڭىرلەردە عىلىمي جوبالاردى كوممەرتسيالاندىرۋ دەڭگەيى تومەن. وتاندىق تەحنولوگيالاردى ناقتى سەكتورعا ەنگىزۋدە قانداي كەدەرگىلەر بار؟»، - دەپ سۇرادى پرەمەر-مينيستر ءاليحان سمايىلوۆ مينيستردەن.
ساياسات نۇربەكتىڭ سوزىنە قاراعاندا، مۇنىڭ تاريحي سەبەپتەرى بار.
«شىن مانىندە قازىرگى تاڭدا وڭىرلەردە كوممەرتسيالاندىرۋ دەڭگەيى تومەن. بۇل جەردە تاريحي تۇسىندىرمە بار. بىزدە قازىر نەگىزگى جوعارى وقۋ ورىندارى، نەگىزگى عىلىمي زەرتتەۋ ينستيتۋتتارى الماتىدا شوعىرلانعان. ستۋدەنتتەرىمىزدىڭ 30 پايىزى، عالىمدارىمىزدىڭ 40 پايىزى سوندا»، - دەدى مينيستر.
ۆەدومستۆو باسىشسى عالىمدار ويلاپ تاپقان تەحنولوگيالاردى ناقتى سەكتورعا شىعارۋ ماسەلەسىن ءۇش باعىتتا پىسىقتاۋعا بولاتىنىن ايتتى.
«ءبىرىنشىسى - زاڭنامالىق باعىت. قازىرگى تاڭدا «عىلىم جانە تەحنولوگيالىق ساياسات تۋرالى» زاڭ قابىلدانىپ جاتىر. ەندى جەرگىلىكتى اتقارۋشى بيلىككە عىلىمدى كوممەرتسيالاندىرۋ، قارجىلاندىرۋ قۇزىرەتى بەرىلەدى. ءار ءوڭىردىڭ جىلدىق عىلىمي زەرتتەۋ جوسپارى قۇرىلادى. ياعني، اكىمدەرگە ءبىز وسىنداي مىندەتتەمە بەرىپ وتىرمىز»، - دەدى ول.
ەكىنشى باعىت - وڭىرلىك جوعارى وقۋ ورىندارىنىڭ الەۋەتىن دامىتۋ.
«Coursera كۋرستارى، «سيفرلىق ۋنيۆەرسيتەت» باعىتتارى، اكادەميالىق ۇتقىرلىق جانە اكادەميالىق باسىمدىق وڭىرلىك ۋنيۆەرسيتەتتەرگە باعىتتالادى. ءۇشىنشى ۇلكەن باعىت - قارجىلاندىرۋ. كەلەسى 3 جىلدا عىلىمدى قارجىلاندىرۋ 3 ەسە وسەدى. بيىل 150 ميلليارد تەڭگە، كەلەر جىلدارى 240 ميلليارد تەڭگە، ياعني، ءۇش جىلدىڭ ىشىندە ءبىز 640 ميلليارد تەڭگەدەن استام ينۆەستيتسيا قۇيامىز. ونىڭ باسىم بولىگى وڭىرلىك ۋنيۆەرسيتەتتەرگە، وڭىرلىك عىلىمعا باعىتتالادى»، - دەدى ساياسات نۇربەك.