ەلوردا اۋەجايىندا 40 رەيس كەشىگىپ جاتىر

استانا. قازاقپارات - نۇرسۇلتان نازاربايەۆ حالىقارالىق اۋەجايى اۋا رايىنا بايلانىستى ءبىرقاتار رەيس كەشىگىپ جاتقانىن ءمالىم ەتتى، دەپ حابارلايدى قازاقپارات.

قازىرگى ۋاقىتتا اۋەجاي شتاتتىق رەجيمدە جۇمىس ىستەپ تۇر، دەگەنمەن كەيبىر رەيستەر كەشىگىپ جاتىر.

ۇشىپ كەلەتىن 26 رەيس، ۇشىپ كەتەتىن 14 رەيس كەشىككەن.

وعان ەلورداداعى مەتەوجاعداي مەن اۋە كەمەلەرىنىڭ كەش كەلۋى سەبەپ بولدى.

اۋەجايدىڭ ۇشۋ-قونۋ جولاعىن قاردان تازارتۋ جۇمىستارى ۇزدىكسىز ءجۇرىپ جاتىر.

«جولاۋشىلاردان اباي بولۋدى، سونداي-اق وزەكتى اقپاراتتى اۆياكومپانيالار مەن اۋەجايدىڭ انىقتامالىق بايلانىس ورتالىقتارىنان بىلۋلەرىن سۇرايمىز» دەلىنگەن حابارلامادا.

ەسكە سالا كەتەيىك، بۇعان دەيىن ەلوردادا اۋا رايىنىڭ قولايسىزدىعىنان ۇشاقتار كەشىگىپ جاتقانىن جازعان ەدىك.

«قازىر قونۋى ءتيىس 10 رەيس، ال ۇشىپ كەتۋى ءتيىس 18 رەيس كەشىگىپ جاتىر. وعان سەبەپ - اۋا رايىنىڭ قولايسىزدىعى»، - دەيدى ەلوردا اۋەجايىنان.