بۇل جايلى جۇما كۇنى Om1.ru پورتالىندا جاريالاندى.
زەينەتكەر جەكە ءۇي-جايدا ءوزى جالعىز بولعان. ءوزى عانا تۇراتىن ول ۇيىندە 40 مىسىق ۇستاعان كورىنەدى. پورتال مالىمەتىنشە، زەينەتكەر ۋاقىتىنىڭ كوپ بولىگىن ءۇيىنىڭ اۋلاسىندا وتكىزىپ، اندا-ساندا دۇكەنگە بارىپ تۇرعان.
ونى كورشىلەرى سوڭعى رەت شىلدە ايىنىڭ باسىندا كورگەن. «الاڭداۋلى كورشىلەرى كەيىنگى كەزدەرى زەينەتكەردىڭ نە كوشەگە، نە دۇكەنگە شىقپاي قالعانىن بايقاعان. ولار ءۇي ماڭىن ارالاپ شىققانىمەن، كۇمان تۋدىرارلىق ەشنارسە كورمەگەن»، - دەلىنگەن پورتال حابارلاماسىندا. وسىدان كەيىن قالا تۇرعىندارى پوليتسيا قىزمەتىنە جۇگىنىپ، ءتارتىپ ساقشىلارى زەينەتكەردىڭ ءۇيىنىڭ ەسىگىن بۇزىپ كىرەدى. ءۇي ىشىنەن ەر ادامنىڭ ءمايىتى تابىلعان. بولجام بويىنشا اش قالعان مىسىقتار زەينەتكەردىڭ مۇردەسىن ازىق ەتىپ، ارتىنان ءبىرىن-ءبىرى جەي باستاعان. حابارلامادا سوڭىندا تەك ءبىر جانۋاردىڭ عانا ءتىرى قالعاندىعى ايتىلادى.