ءاليا انىنە 40 جىل: ونى ەڭ العاش كىم ورىنداعان - كەسكىن
داڭقتى كومپوزيتسيانىڭ ونەر الەمىندەگى العاشقى جەتىستىكتەرى تۋرالى قازاقپارات تىلشىسىنە وسى ءاندى جارىققا شىعارۋعا سەپتىگى تيگەن ادامدار ايتىپ بەردى.
ءان اۆتورى بەلگىلى كومپوزيتور سەيدوللا بايتەرەكوۆتىڭ جۇبايى ءلاززات اقانوۆا-بايتەرەكوۆا باكىر تاجىبايەۆتىڭ سوزىنە جازىلعان «ءاليا» ءانىنىڭ العاش رەت قالاي ورىندالعانىن ءارى قالاي الەمدىك ساحناعا جول تارتقانىن ەسىنە الدى.
«ءاليا ءانىن قانشا ادام ايتتى. ءبىراق روزا رىمبايەۆانىڭ ورىنداۋىنداعى باللادا سارىنى عانا ءاليا مولداعۇلوۆانىڭ ەرلىگىن پاش ەتەتىن سياقتى. روزا مەن ءاليانىڭ وبرازدارى بىتە قايناسىپ كەتكەن سياقتى كورىنەدى ماعان. كونسەرتتەردىڭ بارىندە تىڭدارمان قاۋىمنىڭ تۇرىپ قول سوعاتىنى دا سودان دەپ ويلايمىن»، - دەدى ءلاززات احانوۆا-بايتەرەكوۆا.
اتاقتى «ءاليانى» ۇلكەن ساحناعا الىپ شىعىپ، الەمگە تانىتقان روزا رىمبايەۆا ەكەنى راس. ءبىر قىزىعى ونى ەڭ العاش باسقا ءانشى ورىنداعان ەكەن.
«الايدا، ەڭ العاشقى رەت ونى ناعيما ەسقاليەۆا ورىنداعان. 1977-جىلى ستۋدەنتتەر اراسىنداعى ءان بايقاۋىندا «جەتىگەن» انسامبلىمەن ايتىپ شىقتى. ءاليا ءانى باكىر تاجىبايەۆقا «پەسنيا گودا-1977» فەستيۆالىنىڭ لاۋرەاتى اتاعىن اپەردى.
بۇل ءان سەيدوللا بايتەرەكوۆتىڭ، روزا رىمبايەۆانىڭ دا تاعدىرى ىسپەتتەس. بەلگىلى پروديۋسەر مۇرات يرعالييەۆ تە ءوزىنىڭ ەستەلىكتەرىمەن ءبولىستى. «مەن سول كەزدە قۇرىلىس وتريادتارى جاستارىنىڭ ستۋدەنتتىك كونكۋرسىن ازىرلەپ جاتقانمىن. 1977-جىل بولاتىن. سول جىلى ءاليانى ناعيما ەسقاليەۆا «جەتىگەن» ءانسامبلىنىڭ سۇيەمەلدەۋىمەن ايتتى.
ال روزانىڭ ورىنداۋىندا مەن ءاندى ماسكەۋدە وتكەن «پەسنيا گودا» فەستيۆالىندە تىڭدادىم. روزا رىمبايەۆا الماتىعا كەلگەن كەزدە قالانىڭ كوشەلەرىندە كليپ ءتۇسىرىپ جاتقان ەدىك. مەن بۇل ءاندى «استانا» بايقاۋىندا فيليپپيندىك انشىگە بەرگەم. بۇل كونكۋرستا 50 شەتەلدىك ءانشى قازاق اندەرىن ورىنداۋى ءتيىس بولاتىن. فيليپپيندىك لادين روكساس «ءاليانى» ليريكالىق جانردا ورىنداپ شىقتى. ءلاديننىڭ ەلىندە ءاندى تىڭدارمان ءتۇسىنۋى ءۇشىن ءسوزىن وزگەرتتىك.
فيليپپين تىلىندەگى نۇسقاسىندا ءبىر قىز گۇلدەر اراسىندا جۇگىرىپ جۇرەدى. سول كەزدە قارا قۇستار كەلىپ، اينالانى ورتەي باستايدى. جاڭاعى قىز جەر بەتىندەگى گۇلدەردى ساقتاپ قالۋ ءۇشىن جانىن بەرەدى. اندە ءاليانىڭ اتى ساقتالدى. مۇنداي ينتەرپرەتاتسيادا فيليپپيندىك ءاليا سول ەلدە حيتكە اينالدى»، - دەدى مۇرات يرعاليەۆ.
ءاليانى ەلگە تانىتقان روزا قۋانىش قىزى ءاننىڭ ءوز تاعدىرىنا قالاي اسەر ەتكەنىن ايتىپ بەردى. «نەگىزى بۇل ءاندى ەڭ العاش ورىنداعان «گۇلدەر» ءانسامبلىنىڭ سۇيەمەلدەۋىمەن تىلەكتەس نۇرماعامبەتوۆ بولاتىن. ول كىسى ءوزىنىڭ ارانجيروۆكاسىمەن ءوز تونىندا ايتتى. ال مەنىڭ نۇسقامدى ءوزىمنىڭ جولداسىم تاسقىن وقاپوۆ دايىنداپ بەرگەن بولاتىن. ءاننىڭ اۋەنى، كولەمى باسقاشا بولىپ شىقتى. مەن ءاليانىڭ ارقاسىندا تانىمال بولدىم. ءاليا ءانىنىڭ شىققانىنا 40 جىلدان اسىپ كەتتى»، - دەدى روزا قۋانىش قىزى.
كومپوزيتور سەيدوللا بايتەرەكوۆتىڭ جارى ءلاززات بايتەرەكوۆا اتاقتى ءاننىڭ 40 جىلدىعىن شىمكەنت قالاسىندا اتاپ وتپەكشى. بۇل مەرەكەلىك شارا كومپوزيتوردىڭ مەرەيتويىنا ارنالماق.
اۆتور: گۇلميرا عوسمانالي