بەيجىڭدە ناۋرىز مەيرامىن تويلاپ كەلە جاتقانىمىزعا 40 جىلداي ۋاقىت بولدى - بالاپان راباتوۆ

 استانا. قازاقپارات - قىتاي استاناسىندا تۇراتىن قانداسىمىز، بەيجىڭدەگى ورتالىق حالىق راديوستانساسىنىڭ قۇرامىنداعى قازاق راديوسىنىڭ ديكتورى، اقىن بالاپان راباتوۆ الاش جۇرتىن الدا كەلە جاتقان ناۋرىز مەرەكەسىمەن قۇتتىقتادى، دەپ حابارلايدى قازاقپارات.

 «ۇلىس كۇنى قازاق جۇرتى ءۇشىن ءارقاشان قاسيەتتى، كيەلى سانالعان. قىتاي ەلىندە تۇراتىن قازاقتار دا ناۋرىزدى جىل باسى رەتىندە ەرەكشە اتاپ وتەدى. ناۋرىز كۇنى ءاربىر شاڭىراقتا ۇلكەن شاتتىق ورنايدى. ناۋرىز مەرەكەسىنە بەيجىڭدە تۇراتىن قانداستاردىڭ ىقىلاسى وتكەن عاسىردىڭ 80 جىلدارى وياندى دەسەم قاتەلەسپەيتىن شىعارمىن. ا. ماجيت، ە. ءابىلقاسىم، م. ءابىلقاق، ج. ساعات قاتارلى اعابۋىن وكىلدەرى باس بوپ، اتا داستۇرىنە ساي جەتى دامنەن كوجە جاساپ، كادىمگىدەي مەرەكەلىك قيمىل وتكەن- ءدى. سودان بەرى بەيجىڭدە ناۋرىز مەيرامىن تويلاپ كەلە جاتقانىمىزعا دا 40 جىلداي ۋاقىت بولىپتى. سوڭعى جىلدارى ناۋرىز تويىنا ارنالعان مەرەكەلىك شارا ارناۋلى ونەر ۇجىمدارىن شاقىرۋ، كونسەرتتىك باعدارلاما دايىنداۋ، تەلەارنالارعا ءتۇسىرىپ تاراتۋ سىندى اۋقىمدى ورەگە كوتەرىلدى. ارينە، قىتاي ەلىندەگى بۇل مەرەكەنىڭ ۇلكەنى ش ۇ ا ءو- دە، ءۇرىمجى، قۇلجا، التاي، تارباعاتاي، باركول، اقساي قاتارلى قازاقتار ءجيى قونىستانعان ورتالىق قالالاردا، اۆتونوميالىق وبلىس، ايماقتاردا، اۋدان، اۋىلداردا اسا جوعارى دەڭگەيدە تويلانادى. ۇلتتىق تەلە- راديو ارنالارى، باسپا ءسوز قىزمەتى تۇگەل مەرەكەلىك كورسەتىلىم، راديوحابار، ارناۋلى بەت دايىندايدى. ناۋرىز مەرەكەسى دە مەملەكەتتىك ماڭىزعا يە، ءۇش كۇن دەمالىس بەرىلگەن.

ءتول مەرەكەمىزدىڭ جاڭا ۇرپاقتىڭ سانا- سەزىمىنە ۇلتتىق قۇندىلىقتاردى سىڭىرۋدەگى وسكەلەڭ ءرولىن باعالاعان ابزال. ناۋرىز ەشكىمنىڭ مىندەتتەۋىنسىز ءار قازاققا ماقتانىش بولاتىن، ۇكىلى ءۇمىتى مەن ارمان- تىلەگىنە ۇشتاسقان، اركىمنىڭ جۇرەگىنەن، ىشكى سارايىنان ورىن العان شىنايى مەرەكەگە اينالۋى ءتيىس. الدا كەلە جاتقان  ۇلىستىڭ ۇلى كۇنىمەن الاش جۇرتىن، قازاقستان دەپ اتالاتىن بايتاق ەلدىڭ حالقىن شىن جۇرەكتەن قۇتتىقتايمىن. جاڭا جىلدىڭ باسى ءاربىر جانۇياعا قۇت- بەرەكە اكەلسىن!»، دەيدى اقىن بالاپان راباتوۆ.

 اۆتور: باقىتجول كاكەش