ۇلتتىق ونەر كورمەسىنە وڭتۇستىك قازاقستاندىق 40 قولونەر شەبەرى قاتىسۋدا - فوتو

شىمكەنت. قازاقپارات - «كورمە» سارايىندا قولونەر شەبەرلەرىنىڭ كورمەسى ۇيىمداستىرىلدى، دەپ حابارلايدى قازاقپارات.

مۇندا وزدەرىنىڭ جۇمىستارىن 40 قولونەر شەبەرى ۇسىندى. ولاردىڭ ءبىرى اعاشتان بۇيىمدار جاساسا، ەندى بىرەۋلەرى كيىز بەن جۇننەن ءتۇرلى دۇنيەلەر دايىندايدى.

تۇركىستان قالاسىنىڭ تۇرعىنى ىنتىماق بايانبايەۆتا اكەسىمەن بىرگە وزدەرىنىڭ بۇيىمدارىن ۇسىندى. ولار مىنە، 4 جىلدان بەرى اعاش، اڭداردىڭ سۇيەكتەرى مەن مۇيىزىنەن اسەم مۇسىندەر جاسايدى. ولاردىڭ ءاربىر جۇمىسىنىڭ ءمانى مەن ماعىناسى ءبىر- بىرىنە ۇقسامايتىن ادەمى ءارى قىزىق.

«مىنا ءمۇسىن 1000 تەڭگە تۇرادى. ايەلمەن بايلانىستى كومپوزيتسياعا اعاشتان بولەك سۇيەك پەن ءمۇيىز قولدانىلدى. ول 7 مىڭ تەڭگە تۇرادى. بۇيىمداردىڭ ەڭ ۇلكەنىنىڭ بيىكتىگى 1 مەتردەن اسادى. ونىڭ باعاسى دا قىمبات، ءبىراق مەن ونى 1 جىلدان استام ۋاقىت جاسادىم»، - دەيدى 20 جاسار شەبەر.

 

شەبەرلەر مۇندا وبلىستىڭ كوپتەگەن اۋداندارىنان كەلگەن. ولاردىڭ كوپشىلىگى ءۇشىن بۇل وزگەلەرمەن ىنتىماقتاستىق ورناتىپ، ونىمدەرىن ساتىپ الۋشىلاردى تابۋعا دەگەن زور مۇمكىندىك. كورمەدە ولاردىڭ بۇيىمدارىن الۋشىلار دا كوپ بولدى. مۇندا اسىرەسە ۇلتتىق ناقىشتا بەزەندىرىلگەن كيىمدەرگە قىزىعۋشىلىق تانىتقاندار كوپ. كيىمدەردى ءوز قولدارىنان دايىنداپ الىپ كەلگەن شەبەرلەر ۇسىندى. ولاردىڭ ءبىرى جۇننەن توقىلعان بولسا، كەيبىرەۋلەرى كيىزدەن دايىندالعان. قالاي بولعان كۇندە دە ولاردى كيگەن ادام قالىڭ كوپشىلىكتىڭ اراسىنان ەرەكشەلەنىپ تۇراتىنى انىق. ويتكەنى، كيىمدەر ەرەكشە تالعاممەن، قولدان دايىندالىپ، بەزەندىرىلگەن. مۇنداي ونىمدەر ادەتتە كوپ بولا بەرمەيدى.

 

وسى ۋاقىتتا كورمەگە دايىندالعان تاۋارلار ءالى كوپشىلىكتىڭ نازارىندا. وڭىردەگى قولدانبالى ونەردىڭ مايتالماندارى ەكسپو-2017 كورمەسىنە ۇسىنۋعا بولاتىن ۇزدىك بۇيىمداردى تاڭدايدى.